Loilum Awng Ja Myen hpyen dap hpe, Wunpawng Mungdan Shanglawt Hpyendap KIA kaw na, dai na maga hkying 1 chyen daram hta, zing madu kau lu sai lam, shawng lam magam gun ni kaw na chye lu ai re.
Awng Ja, Madi Yang grup yin hta Myen hpyen dap the KIA dap lapran majan gap gasat hkat taw nga ai shata 3 jan na wa ai hpang, Awng Ja mare hta dap jung tawn ai Myen hpyen dap shara 3 hte hpe htim gasat zing kau lu ai re lam shawng lam magam gun langai KNG shiga dap de ndai zawn tsun dan ai re.
“Awng Ja Myen hpyen dap kaba dai ni gaw lu shagrawt kau sai, rai tim laknak kaba grai naw ngoi ai, nbungli hte mung shani ting sa gap ai. shara shagu na laknak kaba ni hte mung gap bun nga ai.” nga tsun dan ai re.
Namsan Hpyen man maga de lai wa sai July praw 3 ya shani Myen hpyen dap ni htu shadut shang wa ai kaw na majan gap gasat taw nga ai gaw, dai ni ten du hkra matut manoi ding yang gap gasat hkat taw nga ai rai nga ai.
Awng Ja Myen hpyen dap post htim gasat zing madu ai lam hte seng na, KIA shiga magam dap lithkam Dukaba Nhpang Naw Bu KNG shiga dap de ndai zawn matut tsun dan ai re.
“Malawng maga gaw lu zing sai nga na lu ai, raitim gara hku re kun a tsawm tup hkrak grai n chye lu shi ai, ya mung matut manoi naw gap gasat hkat taw nga ai, laknak kaba mung ding yang ngoi nga ai, nbungli hte mung gade lang wa gap ai ngu hpe n matsing ai, shani ting wa gap taw nga ai she nga gaw,” nga tsun ai re.
Awng Ja mare hta majan laja lana gap gasat hkat taw nga ai ten, Hkaya Bum, Hangkai Bum de na laknak kaba ni hte laja lana matut gap sharu bun taw nga ai lam chye lu ai re.
Loilum Awng Ja mare grup yin hta, Myen hpyen dap shara Masum nga ai kaw na, ahkyak ai Army Post hpe September 16 ya shani htim gasat zing kau ai hpang, ngam ai Myen hpyen dap shara lahkawng hpe dai ni bai zing madu ai re lam chye lu ai.
