Myen hpyen dap n pu, Hpakant hkawn kang rung na salang 2 hpe kadai re n chye ai laknak lang ai masha ni rim woi mat ai lam ginra masha ni kaw nna chye lu ai.
Hkawn kang rung lithkam hte, ningtau lithkam Du yan hpe October 10 ya shana maga de, laknak lang masha ni sa rim woi mat ai lam, Hpakant ginra masha langai KNG shiga dap de tsun dan ai re.
“Rim mat wa ai lam gaw teng ai, ya du hkra hpa matut mahkai mung n lu ai, gat sa mari ai ten rim woi mat ai ga rai nga ai,” nga tsun dan ai re.
Hkawn kang rung na magam gun yan lahkawng gaw, shana maga hkying 3 daram aten, Mawwan gat de gat mari sa ai ten rim hkrum mat ai rai nna, mung shawa hking hte mawdaw langai kaw rim woi mat ai nga matut tsun dan ai re.
Dai rim woi mat ai yan hpe ya ten gara shara hta gadai ni rim da ai ngu, matut mahkai tsep kawp n lu shi nga matut tsun dan ai re.
Ndai lam hte seng nna, Hpakant PDF dap na lit nga ai ni hpe KNG kaw na san yu yang, rim ai, n rim ai hte seng na hpa shiga mung n lu shi ai lam, bai htang shana tsun dan ai re.
Hpakant ginra hta, Myen hpyen dap n pu na uphkang salang, wan sat dap hte makan dap magam gun ni jahkring hkring rim hkrum ai lam ni byin wa ai re.
