Myen hpyendap daru magam zing kau ai hpang, masha marai 10 lahta wuhpung nawng sat hkrum ai mabyin (22) lang nga wa ai lam, NLD Party kaw nna, October 11 ya shani n dau da ai re.
Wuhpung nawng sat hkrum ai mabyin hta, Sagaing ginra hta (14) lang law dik byin wa ai rai nna, Jinghpaw mungdaw hta ( 3 ) lang byin wa sai lam tsun da ai re.
Jinghpaw mung hta byin wa ai masum lang gaw, 2022 August praw 8 ya shani Sezin mare hta mung shawa marai 40 sat hkrum ai lam, 2022 October 23 ya shana Anang Pa bawm wa jahkrat ai hta hta marai 62 si hkrum ai lam hte, 2023 October 9 ya shana Munglai Hkyet hta Bawm kaba wa hkrat kapaw ai hta mung shawa marai 29 si hkrum ai mabyin lam ni re lam tsun da ai re.
Myen hpyen dap nbungli hte wa gap sharu sat ai hta, Sagaing Kanbalu ginwang, Pazigyi mare wa gap bun ai hta marai 168 asak si hkrum wa ai law dik re lam chye lu ai.
Dai hta Magwi, Bego, Kayar, Rahkaing, hte Mun ginra ni hta kalang hpra byin lai wa ai lam chye lu ai.
Ndai mabyin lam ni hte seng nna, Myen hpyen dap gaw, mungkan hpyen tara ni hpe tawt lai taw nga ai rai nna, Myen hpyen kongsi dap hpe ahkyak la lu na lam hte machyi hkrum ai n ta masha ni a matu teng man ai mabyin pru wa lu hkra shakut sa mat na lam NLD Party maga tsun da ai re.
Myen hpyen dap a hpyen tara tawt lai ai lam hpe jahkring kau lu na matu, Mungkan rap daw hte mungkan mungdan ni yawng kaw na mung, tang du ai ahkyak la ai lam hpe galaw ya na matu tsun shalawm da ai re.
