Hpyen yen dabang hpe gap bun ai ni lit la ra na re lam, Mungkan rapdaw amu madu kaba tsun
Munglai Hkyet hpyen yen dabang gap hkrum ai lam hte seng na, dai gap bun ai ni lit la ra na re nga, Mungkan rapdaw amu madu kaba Gutarret tsun da ai re.
Wunpawng Mungdan Shanglawt Hpyendap KIA Ginjaw ginra Munglai Hkyet Hpyen yen dabang hpe October praw 9 ya shana yuptung hkying 11 chyen aten, lak lai ai Bawm kaba hte gap hkrum ai majaw, mung shawa marai 29 asak si hkrum ai hta, ma kaji 11 mung lawm ai rai nna, laga mung shawa marai 57 mung hkala hkrum wa ai lam KIO ndau da ai re.
Mungkan rapdaw amu madu kaba gaw, ginra kata n sim n sa byin shangun ai, Myen mungdan kata Myen hpyen dap a htu shadut htim gasat taw ai lam hte gumshem mazut ai lam ma hkra hpe ninghkap jahpoi ai lam tsun da ai re.
Htingbu mungdan ni kaw na mung, Myen mung kata byin nga ai mung masa lam hpe jawm hparan lam tam na matu tsun shadut da ai lam nga ai hpe chye lu ai.
Ya na zawn Munglai Hkyet mabyin lam hte seng nna, Dingdung daw dap hpawm hpung 3 rai nga ai, Rahkaing AA, Kokang MNDAA, Balawng TNLA, ni hku na mung myit n pyaw lawm ai hte, n dai hpe bai jawm matai htang sa wa ai hta KIA hte rau lahkrip ra ra shang lawm sa wa na re lam n dau da ai re.
October praw 9 ya shana, laklai ai Bawm kaba hkrat ai hta, Rahkaing AA dap na, magam gun langai asak si sum wa nna, marai 10 jan hkala hkrum wa ai lam dai n dau hta matut tsun da ai re.
Ya ten dai Munglai Hkyet hpyen yen mung shawa htinggaw 130 jan na, masha 600 hkawt gaw, Woi Chyai Hpyenyen dabang hte Nawng E Hku Buga nawku hpung wang hta sa du machyu shingbyi taw nga ai re.
Mungkan garum ningtum wuhpung UNOCHA kaw na mung, Munglai Hkyet hpyen yen dabang gap kapaw hkrum ai lam gaw, Jinghpaw Mung ting hta nga ai hpyen yen mung shawa yawng hpe myit tsang shangun ai re lam tsun da ai re.
Lai wa sai shata laman Jinghpaw mung hta Majan grau laja sawng wa ai majaw, Hpyen yen mung mare masha ni mung bai kahtap jat wa ai lam UNOCHA matut tsun da ai re.
Ya ten jarit mayan hta hpyen yen ni hpe garum ningtum jaw lu na lam hta Myen hpyen dap maga de na, hkawm sa hkawm wa hte sau n gu htaw shalai ai lam hpe pat hkum da ai majaw, garum ningtum du lu na yak hkak ai shara re lam tsun madi madun da ai re.
