Sagaing ginra, Indaw – Bamauk lam lapran Myen hpyen dap hte Jawngma dap ABSDF, Indaw PDF pawng hpawm dap lapran majan gap gasat wa ai lam ginra masha ni tsun ai re.
Hpyen n-gun 100 daram lawm ai Myen hpyen hpung hte, Jawngma dap ABSDF, Indaw PDF pawng hpawm dap ni lapran October praw 8 ya shani kaw nna, praw 10 ya shani du hkra, Indaw – Bamauk lam, မြသီတာ mare hte ကျွဲကောလေး mare lapran gap gasat hkat wa ai hta Myen hpyen dap maga sum machyi lam law wa ai nga, ginra masha ni tsun ai re.
“Shan hte hpyen n-gun latsa daram hte ndai maga de shang wa ai, ndai maga de na ni mung Bawm hte shawng hkap gasat dat ai, shan hte maga sum machyi lam law sam ai, gap dat bai hkring dat rai, ndai lahkawng ya tsawm ra gap hkat ma ai,” nga tsun ai re.
Dai gap gasat hkat ai hta, hkring dat bai gap dat rai n htoi lahkawng ya gap gasat hkat wa ai hpang, Myen hpyen dap maga bai hting nut mat ai lam chye lu ai.
Nhtoi 2 ya laman gap gasat hkat ai hta, lahkawng maga si hkala ai lam nga wa ai rai tim, gade daram sum machyi ai ngu hpe a tsawm tup hkrak n chye lu ai re.
Majan byin wa ai hpang, Indaw – Bamauk lam hpe Myen hpyen dap maga pat da ai majaw, hkawm sa hkawm wa yak hkak nga ai lam chye lu ai.
