Dawhpum Yang mare lawu, Nawng Gung mare hte Nawng Hkyu mare ni hta wa du nga ai Myen hpyendap ni gaw, dai ginra na mung mare masha nta hpe adup hpaw nna, manu dan ai arai ni hpe lagu mya la mat ya ai lam dai ginra na mung mare masha ni kaw na chye lu ai.
October praw 8 ya shani dai ginra de du wa ai Myen hpyen dap HK.M.Y (370) dap ni rai nna, dai ginra hta wa du lagu sha rawng nga ai nhtoi lahkawng masum ya rai sai lam dai ginra na mung mare masha langai KNG de ndai zawn tsun dan ai re.
“Mana (October praw 8 ya shana) Myen ni yawng shang kasawk mat ma ai, Sam la lahkawng hpe lam madun woi hkawm ai da. Gunrai hpan hkum seng 10 jan hpe adup hpaw mat wa ma ai, dai kaw shan hte ra ai yawng la mat ai ga rai nga ai,” nga tsun dan ai re.
Dai Myen hpyen hpung ni gaw, mung masha marai 2 hpe rim la nna, shawng lam ginra hta lam madun woi hkawm taw nga ai lam matut chye lu ai.
Myen hpyen dap ni dai zawn mung mare masha ni a arung arai lagu mya ai sha n ga, manu dan ai rai ni yawng hpe mung adup jahten kau da ya ai lam ni nga ai hpe chye lu ai.
