Danai hte Shingbwi Yang lapran, Lido lam nmaw makau hta Naga ramma ni hpe madung da nna, hpyen lahkawn nga ai majaw, Naga ramma ni hkawm sa hkawm wa lam hta yak hkak nga ai lam chye lu ai.
Myen hpyen dap daru magam zing kau ai hpang, Danai ginra hta shara jahkrat let, ningnan bai hpaw dat ai Naga rawt malan hpung ni hte seng nna, mung shawa langai KNG shiga dap de tsun dan ai re.
“kaga masha ni nga yang, n rim ai. Naga ramma re ni tsawm ra lawm mat sai, ra ahkyak na hkrun lam gan hkawm ai ramma marai 10 hta marai 6 gaw rim nan rim hkrum ai, shani shagu chyawm gaw n re , shata mi hta kalang, lahkawng lang re, dai rim lahkawn ai shani ang na hpe tsang ai majaw, gadai n gwi hkawm ai,” nga tsun dan ai re.
Ya na zawn hkrun lam hkawm mung mare masha ni hpe madung rim ahkyak la taw ai shara ni gaw, Lungja Bum, Shinglung ga, Tarung mare hte Shwebwi yang lapran shara ni hta rai nna, lai wa sai 2022 ning August shata daram kaw na rim lahkawn taw sai rai tim, n dai laman kaw na grau laja lana rim lahkawn wa ai lam chye lu ai.
Hpyen nau rim lahkawn ai majaw, Naga ramma ni tinang mare buga de wan gan du mayu ai rai tim, ndai masa lam a majaw, nta buga n gwi wa ai lam ni byin hkrum nga ai lam matut chye lu ai.
Naga ginra de hkawm sa na rai yang, madung Hugawng Danai lido lam kaba hku sha madung hkawm sa ra ai re.
Naga ginra hta lai wa sai ten, Naga Amyu Sha Socialist Kongsi NSCN-K ngu mying ai laknak lang wuhpung langai sha nga ai rai tim, Myen hpyen dap daru magam zing kau ai hpan, dai NSCN-K kaw na ga garan ai laknak lang wuhpung ningnan langai bai pru wa ai lam re hpe chye lu ai.
