Mungmyit Sinli, Namhpakka mare makau grup yin hta Myen hpyen dap hte Balawng TNLA dap majan laja lana byin nna, Myen hpyen dap maga n bungli hte mung wa gap bun nga ai lam chye lu ai.
September 26 ya jahpawt hkying 11 daram aten, Namhpakka Hk.L.Y 123 Myen hpyen dap hpe Balawng TNLA dap ni shawng laknak kaba hte sa gap bun ai hpang, Myen hpyen dap mung laknak kaba hte bai gap bun wa ai kaw na majan laja wa ai re lam, dai ginra na mung shawa langai KNG shiga dap de tsun dan ai re.
“Namhpakka Myen hpyen dap hpe Balawng ni shawng sa gap ai, kawng n tsa kaw na gap bun sam ai, dai hpang mare kata de laknak kaji kaba ni hte gap bun ai, mare kata hkrat ai mung lawm ai, laknak kaba nau ngoi ai majaw, jawng ni, gat ni yawng pat kau ai, hkrit na yawng hprawng ma ai.” nga tsun dan ai re.
Shani ga-ang hkying 2 daram hta Mai Yu mare makau na Balawng TNLA dap ni hpe Myen hpyen Jet Fighter n bungli hte Bawm kaba 3 sa jahkrat bun kau da nna jak sinat ni hte mung gap bun kau da ai lam chye lu ai.
September 25 ya shani hta mung, Je Lan mare makau grup yin gap gasat hkat ai hta, Myen hpyen Holicopter hte sa gap bun wa ai lam nga ai re hpe chye lu ai.
Dai zawn lahkawng maga dap laja lana gap gasat hkat taw nga nna, si hkala sum machyi ai lam ni hpe gaw a tsawm tup hkrak n chye lu ai re.
Ya ten dai ginra na mung mare masha ni yawng hpe ga n hkun gaduk htu shagreng na lam, TNLA dap maga matsun da ai lam nga ai hpe chye lu ai.
Namhpakka ginra masa lam hte seng na, laksan lamang hta Nhkum Lu Lu Din hkum hkum tsup tsup tang madun da ai hpe bai na lu na re.
