Daru hka Myen hpyen dap hpe htim gasat zing kau ai hpang, Myitkyina de na hpyen n gun garum lung wa ai Myen hpyen hpung ni hpe KIA dap ni September 22 ya jahpawt hkap gasat ai hta, Myen hpyen dap maga sum machyi lam law wa ai nga, shawng lam hpyen shi sawk ni kaw na chye lu ai.
September 22 ya jahpawt Myitkyina kaw na lung wa ai Myen hpyen hpung ni hpe KIA Dapba 1 npu Dung 4 ni hkap shingla gasat ai hta, Myen hpyen la marai 10 jan si nna, mawdaw 2 hpe mung nat jahten kau ya ai hte, dai kaw lawm lung wa ai laknak machyu pala alaw alam hpe padang dip zing la lu ai lam KIA Shiga dap lithkam Dukaba Nhpang Naw Bu n dai zawn tsun ai re.
“Myen hpyen dap ni lung wa ai hpe KIA Dung 4 ni hkap gap ai teng ai, dai kaw lawm lung wa ai arai ni yawng hpe zing la ngut ai hpang, mawdaw 2 hpe nat kau ya ma ai da.” nga tsun dan ai re.
Dai kaw lawm ai laknak machyu pala ni hta, Laknak kaba sadek 17, Machyu pala buri kaba 3 hte, sinat kaji kaba ni hpe lu zing la ai rai nna, Myen hpyen dap maga de na, dap up Dumjum langai hte Hpyen ma marai 10 jan si ai lam, shawng lam magam gun langai KNG shiga dap de tsun dan ai re.
Dai Myen hpyen dap ni lung wa ai ten, Mung mare masha ni hpe mung, Hpyen ninggang shatai na matu rim woi lung wa ai hta mung shawa marai 2 mung si lawm mat ai lam chye lu ai.
Myen hpyen dap ni portar rim woi lang ai mung shawa nkau lawt wa ai lam chye lu ai rai tim, marai gade gara hku na lawt wa ai ngu hpe a tsawm tup hkrak rai n chye lu shi ai re.
Daru Hka Myen hpyen dap post hpe htim gasat zing kau ai hpang, Myitkyina Sumprabum hkawm sa hkawm wa hkrun lam hpe Myen hpyen dap maga hkum pat da nna, September 21 ya shana maga Tang Hpre Myen hpyen dap hta, mung shawa ni hpe hkap rim woi ai lam galaw wa ai hpe chye lu ai.
Ya ten Myen hpyen dap maga, Sumprabum maga de hpyen n gun kaba hte matut htu shadut taw ding yang rai nna, dai ni September 25 ya shani hta mung Sumprabum lam maga de matut lung wa taw nga ai lam ginra masha ni tsun ai re.
