Madi Yang, Awng Ja mare hta Myen hpyen dap ni dai na maga n bungli hte bawm sa jahkrat bun kau da ai lam chye lu ai.
September 25 ya shana maga ( 3:45 Pm) aten, Jet Fighter n bung li 2 hte bawm wa jahkrat bun kau da ai lam, shawng lam magam gun ni tsun dan ai re.
Awng Ja mare lam kaba makau dap jung tawn ai Myen hpyen dap hpe KIA dap maga na, Laknak kaba Drone hte shani shagu gap bun taw nga ai lam KIA shiga dap lit hkam Dukaba Nhpang Naw Bu KNG shiga dap de tsun dan ai re.
“Madi Yang, Awng Ja hpe gaw shani shagu gap ai, ndai Awng Ja Myen dap ni hpe e laknak kaba ni, Drone ni hte rai gap ai. Myen ni mung laknak kaba hte bai gap rai, Awng Ja na ni gaw, shinggan de gale pru na yak mat ai re majaw gaw, dap kata hta sha rawng taw ai hpe anhte maga na ni laknak kaba, Drone ni hte gap shatsang taw nga ai ga rai nga ai.” nga tsun ai re.
Ndai masum ya laman Madi yang Awng Ja hta Myen hpyen dap maga si hkala hkrum ai Dujum madang marai 2 hte hpyen la marai 10 jan si ai lam, shawng lam magam gun ni matut tsun dan ai re.
Manmaw maga de na lung wa ai Myen hpyen hpung hte dai Awng Ja mayan hta rawng nga ai Myen hpyen hpung ni ya ten du hkra rai n lu hkrum shi ai rai nna KIA a hkap shingla gasat ai hta, sum machyi ai lam ding yang hkrum nga ai re.
Ndai laman Myitkyina Manmaw lam kaba n tsa Myen hpyen dap hte KIA dap shani shagu ngu na majan laja lana gap gasat hkat taw nga ai re.
