Hpakant mare numshang, Pantin mahkrai baw hta dung ai Myen hpyen dap gate hpe KIA, PDF dap ni sa htim gap gasat ai hta, marai 3 lahta si hkala ai lam nga wa ai lam Hpakant ginra masha ni kaw na chye lu ai.
September praw 20 ya shani ga – ang hkying 12 daram aten, Pantin mahkrai baw hta dung ai Myen hpyendap hte Balik ni hpe sa htim gap gasat ai hta, si hkala lam law wa ai nga, Hpakant PDF na lit nga ai magam gun langai KNG shiga dap de tsun dan ai re.
“Anhte maga na shawng htim gap gasat ai re ai, dai kaw kalang ta galau si mat ai marai 3 re, kata de mung si ai gaw nga na re, gade ram kaning re ngu ai hpe a tsawm tup hkra n chye lu ai.” nga tsun dan ai re.
Dai Myen hpyen dap shagyit gaw, Myen hpyen dap dapnu 33 hte, balik dap dung 28 ni pawng hpawm nna, dung ai shara rai nna, Hpakant pru wa shang wa mung shawa ni hpe san jep ai shara re lam chye lu ai.
Dai shara hpe sha lai wa sai July 21 ya shani Wunpawng Mungdan Shanglawt Hpyen dap KIA Dung 6 hte, PDF ni pawng hpawm nna, sa htim gap gasat ai hta, Myen hpyen dap maga marai 5 si hkrum wa sai re.
Hpakant hta Myen hpyen dap daru magam zing kau ai hpang, Myen hpyen dap shagyit ni jahkring hkring gap gasat hkrum nga ai re.