Kamaing, Kawng Ra mare, mare gawknu hta wa du dap jung nga ai Pyithutsit hpung ni hpe KIA hte PDF dap ni, dai ni shani ga ang hkying 11 daram aten Drone hte bawm sa jahkrat bun ai lam, Kamaing ginra masha ni kaw na chye lu ai.
Hpyen n gun 50 daram lawm ai dai hpyen hpung ni gaw, September 15 ya shani kaw na, Kawng Ra mare na, shawa gawknu hta wa hkring taw nga nna, lai sa lai wa mawdaw ni kaw na gumhpraw hta sha ai hte, mung mare masha ni hpe san jep ai lam laja lana galaw taw nga ai lam Kamaing ginra masha langai KNG shiga dap de tsun dan ai re.
Dai zawn mung shawa ni hpe jahkrit shama galaw nga ai Pyithutsit hpung ni hpe KIA hte PDF dap ni kaw na dai ni shani ka ang hkying 11 daram aten Drone hte bawm sa jahkrat bun kau da ai hpang, Pyithutsit dap maga laknak kaji ni hte gap shadam bun wa ai re lam chye lu ai.
“Jahpawt maga hkying 11 daram aten hta re, Kamaing na Pyithutsit ni hpe mare gawknu hta wa nga na, gate jahkrat da ai. dai hpe KIA hte PDF ni Drone hte bawm 2 sa jahkrat bun kau da ma ai. n sen kaja ja, dai sa jahkrat bun da ai hpang Pyithutsit maga laknak kaji ni hte gap shadam bun wa ma ai, laga si hkala ai lam gaw nna ai.” nga tsun dan ai re.
Pyithutsit dap ni hkring nga ai shara gap hkrum ai majaw, hkying hkum chyen mi daram mare kata de sinat kaji ni hte gap shadam bun wa nna, Kamaing Myen hpyen dap kawng na laknak kaba ni hte KIA nga ai maga, gap shadam bun wa ai re lam chye lu ai.
Drone hte gasat ai hta, si hkala ai lam n nga ai rai tim, mung mare masha ni hkrit kajawng ai lam ni byin wa ai hpe chye lu ai.
Sinat kaji kaba ni hte gap shadam bun wa ai majaw, Kamaing mare hpaji jawng ni hpe mung pat kau ra ai lam chye lu ai.
Ya ten Kamaing muklum pru shang lam ni hpe Myen hpyen dap hte Pyithutsit dap ni kaw na laja lana san jep ai lam ni galaw taw nga ai hpe chye lu ai.
