Myitkyina Lekung, Zilun lawk 2 na ramma marai 11 hpe August 28 ya shana, Myen hpyendap rim mat wa ai lam chye lu ai.
Rim hkrum ai marai 11 hta La marai 6, Num marai 5 rai nna, PDF ramma magam gun langai lawm mat ai nga, PDF hte ni nawn ai mung shawa langai KNG shiga dap de n dai zawn tsun dan ai re.
“Lekung lam masun 18 kaw na PDF hte hpawn ramma ni hpe sa rim woi mat wa ai. sa rim woi ai hta PDF re mung lawm ai, n re ni mung yawng lawm mat ai. yawng rai yang marai 11 re da. dai hta PDF gaw langai sha lawm ai, shi nan mung PDF re nga yin la sai nga tsun ai.” nga tsun dan ai re.Dai rim woi mat ai ramma ni hpe bai dat ya ai lam nga n nga hte gara hku kaning rai galaw hkyen ai ngu hpe a tsawm tup hkrak rai n chye lu shi ai re.
Myen hpyen dap maga na Myitkyina muklum n tsa hta PDF dap ni a shamu shamawt lam hpe hkan taw ai na sai nga, matut tsun dan ai re.
Myitkyina muklum n tsa, Myen hpyen dap hpe shiga jaw ai ni law ai majaw, ramma ni jahkring hkring rim hkrum taw nga ai re.
Myen hpyen dap ni kaw na mung, mung shawa hking hte yu maya mawdaw jawn nna, muklum kata ding yang shing grup hkawm nga ai lam chye lu ai.
