Myen Hpyendap Laknak Kaba Gap Bun Ai Majaw, Mungshawa Marai Langai Si
![](https://kachin.kachinnews.com/wp-content/uploads/2023/08/371135451_1003668667609837_8188247667388948238_n-780x470.webp)
Mungmyit Sinli, Namhpakka mare hta Myen hpyendap laknak kaba gap bun ai majaw, asak 15 ning, ma num kasha langai si nna, marai 2 hkala hkrum ai lam chye lu ai.
August 30 ya jahpawt hkying 7 daram aten hta, Namhpakka 123 Myen hpyen dap kaw nna laknak kaba ding yang gap shadam bun wa ai gaw, dai hpawt hkying 10 daram aten, mung mare masha n ta wa hkrat hkra ai majaw, si hkala hkrum wa ai re lam, Namhpakka mare masha langai KNG de n dai zawn tsun dan ai re.
“Daihpawt hkying 7 daram aten kaw na, laknak kaji kaba n sen bai ngoi hpang sai ngu yang, hkying 10 daram aten hta gaw mung shawa wa hkra sai gaw, gat n pu na miwa n ta langai kaw wa hktat ai hta, la langai hkala ai, ngut na mare baw maga de wa shat sa la taw ai num kasha lahkawng kaw wa hkrat ai, langai gaw dai kaw nan si mat nna, langai gaw hkala sawng wa ai. ya dai hkala sawng ai ni hpe Kuthkai tsi rung de sa da ai.” nga nna, tsun dan wa ai re.
Laknak kaba si a majaw si hkrum ai num kasha ma gaw, asak 15 ning re ai Ah Su ngu ai Miwa ma re lam chye lu ai.
August 29 ya shani Nam Um mare shingdu, KIA Dung 9 ni nga ai Bakngoi bum maga de Myen hpyen dap ni htu shadut lung wa ai majaw, majan gap gasat ai lam ni nga wa ai re.
Dai ginra hta, August 28 ya shani kaw na, Myen hpyen dap hte TNLA dap ni gap gasat hkat wa ai majaw, Namhpakka Myen hpyen dap kaw na laknak kaba ding yang gap bun nga ai rai nga ai.
Dai gap bun ai hta, mani 29 ya shani lani mi hta sha laknak kaba 30 lang jan gap bun wa ai hta, Mung mare masha n ta 5 jan hkra hten ai lam chye lu ai.
Ndai laman Myen hpyen dap hte Balawng TNLA dap ni Namhpakka hte Je Lan mara makau grup yin hta laja lana gap gasat taw nga ai kaw, Balawng TNLA dap maga de na mung sum machyi lam law wa ai nga, dai ginra na mung shawa ni kaw na chye lu ai.