KIO ginjaw ginra, Madi Yang, Awng Ja mare makau grup yin hta chyat rawng nga ai Myen hpyen dap ni hte Wunpawng Mungdan Shanglawt Hpyendap KIA dap lapran, August 30 ya jahpawt Na Lung hka chyang hka hta majan bai byin ai re.
Dai Myen hpyen hpung gaw, dai mayan hta chyat rawng taw nga ai shata mi jan na wa sai rai nna, jahkring mi gan shamu pru wa ai ten gap gasat hkat ai re nga, shawng lam magam gun langai KNG hpe tsun dan ai re.
“Dai hpawt gaw hka chyang hka ram kaw bai gap hkat ai. chyat rawng taw ai kaw na kanaw pru wa ai she n rai i.” nga tsun dan wa ai re.
Ya ten dai ginra hta hpyen masa matut ding yang shaja hkat taw nna, laknak kaba ni hte shani shagu ngu na gap gasat hkat taw nga ai re lam chye lu ai.
Namsan Yang ginra de Myen hpyen dap gaw ya ten, Myitkyina Manmaw lahkawng maga de na hpyen man htu shadut taw nga ai rai nna, shan hte htu shadut shang wa ai lam ni hta laknak kaji kaba gap shadam bun let htu shadut shang wa taw nga ai re lam shawng lam magam gun ni kaw na chye lu ai.
Dai zawn ya ten Manmaw maga de na hpyen lang arung arai hte malu masha htaw ai mawdaw kaba ni Namsan Yang maga de lung wa taw nga ai rai nna, ya ten Namlang Myen hpyen dap kata wa du but rawng nga ai re lam chye lu ai.
Dai Mawdaw hpung ni hpe August 28 ya shana KIA hte PDF dap ni kaw na, Ma U Pin mare makau kalang, Myothit mahkrai pawt hta kalang hkap shing la gasat dat ai hta, Myen hpyen dap maga machyi hkrum ai lam ni nga wa ai hpe chye lu ai.
Ya ten Myen hpyen dap, laknak arung arai htaw ai mawdaw hpung ni Namsan maga de lung wa taw ai majaw, ndai laman lam ding yang majan matut laja wa mai ai majaw, Dawhpum Yang mung mare masha ni myit tsang nga ma ai re.
