Mungmyit Sinli, Muse ginwang, Nam Um mare makau hta Myen hpyen dap hte Wunpawng Mungdan Shanglawt Hpyendap KIA Dung (9) dap lapran majan byin taw nna, deng 105 maga de nna mung, laknak kaba gap garum nga ai lam chye lu ai.
August 29 ya jahpawt, hkying 10 daram aten, Nam-Um mare shingdu KIA Dung 9 ni nga ai Bakngwi bum maga de Myen hpyen dap ni htu shadut lung wa ai majaw, majan byin wa ai re lam, Nam-Um ginra masha langai KNG de n dai zawn tsun dan ai re.
“Myen hpyen dap ni shanglawt ni nga ai maga de htu shadut lung wa na gap hkat ai ga rai nga ai, mani hpawt kaw na gap hkat ai, mana jan du lup laknak kaba gap ai, dai hpawt mung hkying 10 daram kaw na bai ngoi hpang wa ai ga rai nga ai.” nga tsun dan ai re.
Dai ginra de Myen hpyen dap ni August 27 ya shani kaw na htu shadut shang wa ai majaw, mani hpawt kaw na majan byin hpang wa ai rai nna, Mung Yu 105 Mile hte Namhpakka Hk.L.Y (123) dap kaw na laknak kaba ni hte ding yang gap bun wa ai re lam chye lu ai.
Dai zawn Myen hpyendap ni gap dat ai laknak kaba si Nam-um mare hta wa hkrat nna, mung shawa n ta langai hten mat ai lam chye lu ai.
Ya ten dai ginra hta, TNLA Balawng dap ni hte mung laja lana gap gasat taw nga nna, mung mare masha ni tinang ni nawn ai shara ni de hprawng yen taw nga ai lam chye lu ai.
Ya ten dai ginra de htu shadut taw nga ai Myen hpyen hpung ni gaw, Lashio Kuthkai maga de na lung wa ai hpyen hpung ni rai nna, Nam Hkam maga de hpyen hpung mi, KIA ni nga ai Nam Um mare shingdu maga de hpyen hpung mi, Namhpakka Balawng dap ni nga ai maga de hpyen hpung mi rai, hpyen man masum garan nna, htu shadut hkawm taw nga ai re lam chye lu ai.
Dai zawn Myen hpyen dap ni hpyen man masum hte laja lana htu shadut taw nga ai majaw, ya ten dai ginra hta KIA, TNLA dap ni hte Myen hpyen dap laja lana gap gasat hkat taw ai lam, ginra masha langai n dai zawn matut tsun dan ai re.
“ya ten Nam – Um mare makau grupyin myen hpyen dap ni htu shadut taw nga ai, Balawng ni hkawn kang hta taw ai majaw, sinat nsen ni mung jahkring hkring nga ai, mung mare masha ni hkrit tsang ai majaw, bungli galaw lu galaw sha lam ni hta mung grai yak hkak wa taw nga ai law.” nga tsun dan ai re.
Myen hpyen dap ni kaw na n dai laman Mungmyit sinli ginra de hpyen n gun kaba hte htu shadut htim gasat taw nga ai majaw, Kuthkai – Namhpakka – Muse mawdaw lam kaba ntsa hte mare kahtawng n kau hkan na hpaji jawng ni law malawng hpe pat da ra ai lam chye lu ai.
