Hpakant ginra hta lagut, damya let, mungshawa ni hpe jahkrit sharim, gumhpraw masu hkalem sha taw nga ai Pyosawhti, ningbaw Bo Saw Maung ngu ai wa hpe lu rim da sai lam, KPDF ni kaw na chye lu ai.
Shi hpe August shata praw hta, Sengtawng mare n ta langai kaw mung shawa ni jawm rim ai re lam, KPDF dap na lit nga ai salang langai KNG de n dai zawn tsun dan ai re.
“Shi hpe lu rim ai ten, sawt ai Sinat gadun (အတု) langai hte hpawn lu rim ai, dai sinat gadun hta GPS shakap da ai hpe mu ai.” nga tsun ai re.
Pyosawhti ningbaw Bo Saw Maung woi awn ai hpung ni gaw, Hpakant ginra sut du, lusha seng madu, KTV seng zawn re ni hpe jahkrit sharim ai lam ni galaw nna, gumhpraw hpyi sha taw ai wuhpung re lam chye lu ai.
Lu ai gumhrpaw hpe Hpakant Tatma mu hte garan sha ai re nga, dai wuhpung ni hpe san jep ai hta Pyosawhti ningbaw wa nan hkam la tsun shapraw wa ai re nga, KPDF maga na lit nga ai ni matut tsun dan ai re.
Dai zawn lagu lagut damya mya ai lam hpe, Hpakant Myen hpyen dap, dapnu 33 na Dukaba Min Htet Aung ngu ai wa a matsun hte galaw taw nga ai rai nna, dai zawn damya mya la na lu wa ai gumhpraw hpe dai Dukaba wa hte maren hpra garan sha hkat ai lam chye lu ai.
Myen hpyen dap daru magam zing kau ai hpang, Hpakant ginra hta, lagu lagut, damya mya ai lam, masha sat ai amu mang hkang ni jahkring hkring byin nga ai rai nna, n dai zawn re lam ni hpe Myen hpyen dap ni gaw, shing du kaw nga na shabyin taw ai lam re nga, Hpakant ginra masha langai tsun maram da ai re.
Hpakant ginra hta dai zawn re lam ni byin nga ai majaw, mung mare masha ni kaw na myit tsang let nga nga ra taw ai lam mung mare masha ni tsun ai re.
