Hpakant, Mawwan lawk, Pan Tin mahkrai hta dung ai, Myen hpyen dap shagyit hpe July 21 ya jahpawt jau KIA hte PDF dap ni, sa htim gap gasat ai lam chye lu ai.
Dai jahpawt jau hkying 1 daram aten, laknak kaba 2 lang ngoi ai hpang, sinat kaji hte gap sharu bun hkat wa ai majaw, dai makau grup yin hkan na mung shawa yawng hkrit kajawng ma ai lam, dai ginra na mung shawa langai KNG de ya na zawn tsun dan ai re.
“Yawng yup pyaw nga ai ten, sinat ding ding dang dang ngoi wa ai, yawng kajawng jawng ai, laknak kaba 2 lang shawng ngoi pru wa ai. yawng dumbri dumbra she re.” nga tsun dan ai re.
Ya sa gap hkrum ai shagyit gaw, Hpakant mare num shang shagyit rai nna, Myen hpyen dap daru magam zing ai hpang, lai was ai shaning kaw na, Myen hpyen dap hte balik pawng na, marai 20, 30 dap jung ai shagyit re lam chye lu ai.
Dai shagyit hta, Myen hpyen dap ni gaw lai sa lai wa mung mare masha ni hpe san jep ai rai nna, shanhte n tsen n hten ai ni hpe rim ahkyak la ai hte yup tung ten lai hkawm ai ni hpe jahkrit shama gumhpraw hta sha taw ai shara re lam, mung shawa ni matut tsun dan ai re.
Ndai majan hta, lahkawng maga na si hkala ai lam hpe atsawm tup hkrak n chye lu ai re.
Hpakant ginra hta lai wa sai ten hkan, Lay Pyin Myen hpyen dap shagyit hte Kamaing Myen hpyen dap zawn re ai ni hpe jahkring hkring htim gasat hkrum ai rai tim, Ndai Pan Tin mahkrai shagyit hpe sa gasat ai gaw, ndai shawng ningnan lang re lam chye lu ai.
