Naga ding hkrai Uphkang ginra, Namyun, Pangsau ginra de, N-gu manu htam 3 rawt mat ai majaw, dai ginra na mung shawa ni hkainu shat sha ra taw ai lam chye lu ai.
Namyun mare kaba hta lai wa sai ten, N-gu buk mi manu mun 4 daram sha nga ai raitim, Myen hpyen dap daru magam zing kau ai hpang, gau ngwi ngwi rawt lung wa ai gaw, ndai July shata hta, N-gu buk mi Sen mi Mun kru du hkra rawt mat ai lam chye lu ai.
“Laiwa sai June shata kaw na, anhte Naga ginra de Myen hpyen dap kaw na, Sau N- gu yawng pat kau ya ai, dai kaw na manu grau grau tsaw wa ai. Ya ten yak hkak ai Mung shawa ni Hkai nu shat shalaw sha na nga ta ma ai.” nga dai ginra na Salang langai KNG de tsun dan ai re.
Myen hpyen dap gaw, lai wa sai June shata kaw nna, dai ginra de Sau, N-gu htaw shalai ai lam ni yawng hpe tsep kawp hkum pat kau ai hte Lanam ta mawdaw lam ni yawng hten taw ai majaw, ya na zawn manu tsaw rawt taw ai re lam matut chye lu ai.
Namyun, Pang Sau ginra na mung shawa ni gaw, gun rai ni hpe Danai Shingbwi Yang maga de na htaw shalai ginlen la taw ai mung rai nga ai.
Dai ginra gaw Myen mungdan kata matsan yak hkak dik ai shara rai nna, Myen hpyen dap daru magam zing kau ai hpang rai tim, hpa majan byin ai lam mung n nga ai zawn, Myen hpyen dap a uphkang rung ni yawng shi hte shi ding yang kri taw ai mung rai nga ai.
Dai ning laman Nam Yun mare kaba hta galaw wa ai Naga shingning n-nan poi kaba hta, Myen hpyen dap ningbaw Min Aung Laing wa du nna, Naga ginra rawt jat galu kaba wa hkra galaw sa wa na lam tsun ai rai tim, shinggan ta tut hta grau grau matsan jat nna, hkai nu shat sha ra ai madang du wa ai mung rai nga ai.
