Mungmyit Sinli Kuthkai ginra hta, Mati rim hkrum ai amu manghkang hte seng na, mungshawa hte KIO Salang ni tsun hparan la lu sai lam chye lu ai.
Lai wa sai July 16 ya shani, Kuthkai ginwang Namgut mare gaiwang, Nanoi pa hta, ginra masha n kau, mati hkan mari dut nga ai ten, Shanglawt salang ni gaw mung shawa ni mari da ai mati htingga kaba mi hpe rim la mat nna, mati tam ai wa hpe mung adup gayet kau da ai mabyin byin wa sai re.
Dai zawn byin wa ai mabyin lam hte seng na, KNG Jinghpaw Shiga dap Radio lamang hta July 18 ya shana shapoi mara dat ai hpang, seng ang ai ginwang daw lit nga ai Salang kaba ni, dai amu mang hkang hta lawm ai ni yawng hpe shaga gahkyin la nna, lahkawng maga pre nem ai hku hparan la lu sai lam, dai amu mang hkang hta lawm ai amyu shayi langai KNG de tsun dan ai re.
“Nmyit mada ai, nbyin ging ai, myit mala hka ai manghkang chye byin wa ai le. dai hpe apyaw sha ngut la sai. apyaw sha hpran shangut la nna, hkau chyap ai hku mung rai sai. pri nem ai lam gaw zeng sha re sai.”
Dai hkrum jahta hparan ai hta Kuthkai ginwang daw na Salang kaba ni hte ginra masha marai 10 daram lawm nna, July 20 ya shani hparan wa ai re hpe chye lu ai.
Mati htingga rim la hkrum ai mungshawa maga mung, seng ang ai shanglawt salang ni hte myit dik ai hku hparan la ngut sai lam tsun ai re.
Ndai lam hte seng nna ginra KIO salang langai KNG de n dai zawn tsun tawn ai re.
“Anhte a dap kata hte dap grup yin de gaw, ndai kaga jasam hpe n sa shangun ai rai nga ai. jasam hpe n sa tam shangun ai re. shawoi shaning hkan mung, dap grup yin hkan jau na n sa na hku, tsun ai, mung masa mung shuk re majaw gaw, sa tam tim pyi n htoi kaja ai shaloi hkan she tam shangun ai rai nga ai.”
Ndai ginra hta mati joi mi 43,000 hte mari nna, 46,000 hte bai dut sha lu ai re lam chye lu ai .
Mungmyit Sinli ginra hta, KIO salang n kau kaw nna, mazut ai ladat hte, Mung shawa n tsa shinggyim ahkaw ahkang tawt lai ai lam, dingyang galaw nga ai majaw, jaw kaja ai hku uphkang na hpe mung shawa ni ra sharawng nga ai lam, Kuthkai Ginra masha n kau tsun nga ma ai re.
