Rim Da Hkrum Ai Kutkai Buga Masha Hte Matut Nlu Mat Ai Majaw Dum Nta Masha Ni Myit Tsang
Shanglawt Magam gun marai 4 hpe Myen hpyendap rim ai ten, mawdaw gau ya ai Kuthkai buga masha Slg Zau Ja (shing nrai) Slg. Zau Awng, a masa lam shiga hpe dum nta masha ni tsep kawp sagawn n lu mat ai, shata 2 ram na wa sai majaw ma yan nu ni hte rau, dum nta masha ni grai myit tsang nga ma ai re.
Kuthkai daw 7 kaw nga ai, mawdaw gau sha ai Slg.Zau Ja hpe lai wa sai May 18 ya shani kaw nna, Namhpakka Myen hpyendap gate hta hkap rim la kau ai ya shata 2 daram na wa tim, hpa matut mahkai mung n lu mat sai re.
Slg.Zau Awng hpe Myen hpyendap ni rim la kau ai hte seng nna, shi a ningrum ningtau Jan. Lahpai Ja Ing gaw KNG shiga dap de ndai zawn tsun dan ai re.
“Ya du hkra, shiga hpa mung n lu mat ai. Shi gaw Muse hte kuthkai lapran, maw daw gawt sha ai maw daw la rai nga ai. Dan she muse kaw na mahkrai de yu wa na nga yang she, hkrunlam hkawm hkan jawn na masha nlu majaw, nta de jau wa du na amu galaw na nga yu wa, shawoi mung dai hku masha n lu jang jau yu wa wa re rai nga. Dai she dai shani mung masha nlu na yu wa yang, Humung mare kaw masha wa hta htaw ai da. Rai yang dai hkan jawn ai masha ni gaw kaning re re kun nchye le i. Shi na mawdaw la manang ni bai wa mu da ya ai gaw, dai namhpakka myen hpyendap kaw hkring nga ta, yu nga ta ai mu ai nga, dai sha lu chye ai.”
Slg. Zau Ja gaw Asak 42 ning rai nna, ma 3 a kawa re lam chye lu ai. Shi gaw Muse hte Kuthkai lapran mawdaw gawt sha ai wa rai nna, shi rim hkrum ai shani, shi a manang mawdaw la hte ashawng ahpang rai yu wa ai kaw, shi hpe sha hkap jep rim la kau ai rai nga ai.
Ya na zawn, rim la hkrum ai lam gaw, dai shani Humung mare kaw wa hta htaw la ang ai masha marai 4 gaw KIA magam gun ni re majaw re nga, Namhpakka mare na Kanu num langai mung mabyin hpe n dai zawn matut tsun dan ai re.
“Maw daw sara wa gaw passenger kaga n lu jang she, magam dap na ni hte lam kaw wa hkrum ai masa sa ai. Ndai ni yu wa ai lam hpe gaw, Humung kun, Nam-um kun dai khan na ni shiga jaw dat na masa sa ai. raiyang kaga maw daw ni hpe n jep ai sha shanhte mawdaw hpe sha jep na ma hkra hpe rim tawn kau ai lata ya dai ni du hkra, dai ni hpe gara kaw tawn ai ngu hpe shiga mung nna ai, gara kaw kaning zawn nga taw ai ngu hpe anhte kade sagawn tim gara kaw san yu yang mung nnga ai hkrai hkrai. Ya n ta masha ni gaw grai pyi myit tsang taw nga ma ai.”
Dai mabyin a matut manoi, masum ya na ai hpang may 20 ya shani, Kuthkai mare na mung masha langai hpe mung, Myen hpyendap ni sa rim mat ai lam chye lu ai. Raitim dai wa hpe gaw Kuthkai balik dap de ap nna, tawn da majaw, dum n ta masha ni dai wa hpe sa san tim, n chye ai lam sha htai wa ai nga tsun ai.
Shanglawt magam gun marai 4 hpe htaw yu wa ai majaw, Namhpakka gate hta hkap rim la kau ai shani kaw nna, dum nta masha ni hte mare masha ni gaw, Kuthkai Myen hpyendap, balik dap, Namhpakka, dap shara shagu hkan sagawn matut shakut tim, hpa shiga mung n jaw, hpa mung n tsun dan ai dai ni du hkra tsep kawp sagawn n lu shi ai lam chye lu ai.
Shi htaw tawn ai masha gaw, KIA magam dap na ni raitim, maw daw la gaw yu maya masha sha re majaw, shi hpe bai dat ya na matu hpyi shawn nga ai re.
Rim la kau hkrum Salang wa hpe myit tsang let, asak 70 jan re kanu mung shani shana hkrap myi hpwi hte kasha a shiga hpe ala nga ai lam tsun ai.
Lai wa sai June 10 ya jan hta mung, Kuthkai Namhkrai gate hta ramma la marai 2 hpe Myen hpyen dap ni hkap rim la ai hta, marai langai gaw mung masha re majaw bai lawt wa ai rai nna, marai langai gaw shanglawt magam gun re majaw, shiga tsep kawp nna mat sai lam matut chye lu ai.
