Putao ginra hta asak n hpring shi ai num ma kasha lahkawng hpe hkumshan roi rip ai La marai 3 hpe Putao ginwang daju tara rung kaw nna htawng dam 20 ning jahkrat dat sai re.
“Tara rung dung ai shaloi ningdang ai lam nau n nga ai. mara hkamla na re nga mung tsun pru wa ai re. Ngam ai marai 2 hpe mung dai shani jang tara jewat kau ai re. Marai 3 ting Ma roi rip ai amu re. Ngai lit la ai gaw amu 1 sha re” nga nna roi rip hkrum ai num kasha langai hpe yu lakawn taw ai Ko Ye (Putao) KNG hpe tsun ai.
Putao ginra hta maning December kaw nna dai ning March shata laman, asak nhpring ai num ma kasha hpe hkumshan roi rip ai amu mabyin 2 byin lai was ai re.
December shata kaw byin mat ai mabyin gaw Asak 12 ning re, num ma langai hpe la lahkawng roi rip ai mabyin re. Dai yan gaw Myen hpyendap ni a bungli galaw nchyang Aung Wai phyo hte lawu mung, Sagaing maga na putao de bungli wa galaw asak 46 ning San Htwe nga wa re hpe chye lu ai.
Bai nna mabyin langai gaw March praw 2 ya shana, Putao Myoma lawk hta nga ai, 12 ning re num ma kasha langai hpe kanu bai la da ai hpang la wa gaw, shi hpe hkau soi jaw sha na ngu shaga mat nna roi rip ai re.
Mabyin 2 hta hkumshan roi rip hkrum ai num ma kasha yan gaw asak12 ning grup yin daram sha naw rai nga ai. Ndai mabyin ni hta Mara tawt lai ai la marai 3 hpe, ndai bat May 30 ya shani, tara rung kaw nna, htawng dam 20 ning hpra jahkrat dat ai lam Ko Ye Putao kawn KNG de tsun ai.
Ya, roi rip hkrum ai num ma lahkawng a matu jawng lung na hte kaga ra ahkyak ai ni nga ai majaw garum ntum ra ai hpe mung chye lu ai
Putao ginra hta shawngde mung, asak nhpring ma kaji ni hpe roi rip ai mabyin grai law hkra byin lai sai raitim, tara upadi hku nna ahkyak la ai lam gawngkya ai lam ni nga ai hpe chye lu ai