Myitkyina, Awngnan lawk, wan leng daru CDM magam gun ni nga ai dabang hte gat seng ni hpe htawt sit kau na matu Myen hpyendap shadut taw nga sai re.
“Shanhte dai sadi jaw laika pa sa shakap ai shani kaw na gat seng, n’ta yawng hpe jak kaba ni hte hpya kau na hku hkyen nga sai re. Rai na M.P.Hk kaw na hpyenla ni maw daw hte sa na ban gar kaduk ni galaw htu nga sai re” nga nna CDM magam gun langai tsun ai.
Myen hpyen dap ni gaw CDM magam gun n’ta masha ni yawng hpe June 15 ya shani hpang jahtum htawt sit na lam, htawt sit ai lam n nga yang upadi hte maren, ahkyak la mat na re lam sadi jaw laika kaw ka shalawm da ai re.
Myen hpyendap ni atik anang gawt shapraw ai majaw, CDM magam gun ni nga shara nlu nna Mali hka kau hkan, ginsum gap let nga taw ai lam chye lu ai re.
Myen hpyen dap daru magam zing kau ai hpang, hpyen dap hpe ninghkap ai CDM ni kaw na wan leng dap na magam gun ni law htum re lam chye lu ai.
