Nmawk mare makau, Lungja Bum lagaw hta Myen hpyendap ni dap jung ding yang re majaw, Wawang buga masha masha ni, yi sun hkauna galaw sha na matu yak hkak nga ai re.
Wawang mare hte deng 2 sha tsan ai shara hta Myen hpyendap shara jahkrat da ai majaw, bungli shang na matu myit tsang nga ai lam, ginra masha langai KNG shiga dap hpe tsun dan ai re.
“Lungja Bum npu kaw hkauna lu ai ni mung hkrit na n-gwi galaw ai nga tsun ai ni law nga ai. n galaw sai, n-gwi galaw ai nga tsun ai ni hkrai re. Maning hkai da ai ni hpe mung Nga, Dumsu ni kabye kau Myen hpyenla ni kau ai hte dai ning mung gara hku bai byin wa na nchye nga ai. Hpyen masa gaw ya amyu mi ya hkring nga yang amyu mi rai taw nga ai’’ nga nna tsun ai.
Wawang buga masha ni Nmawk de hpyen yen ai ladaw shata 7 daram du wa sai re.
Myen hpyendap ni gaw Lungja Bum pawt kaw nga ai kyuhpyi bum hta hpriju sumri ni kum da nna, hpyen n’gun 50 daram hte dap jung shara jahkrat nga ai re.
Bai nna, hpyen nbungli ni mung jahkring hkring pyen gayin du wa ai lam nga ai. Shana aten ni hkan mung dat wan kaba ni nan nna kalang maram laknak kaba ni hkrup mara gap shadam bun ai lam ni galaw nga ai hpe ginra masha ni tsun ai kaw na chye lu ai re.
Laiwa sai April 20 ya shani, mare masha langai yi sa ai kaw Myen hpyen dap ni hkam da ai hkam bawm kabye kapaw la nna asak si sum mat ai mabyin mung byin wa sai re.
Dai majaw, Lungja Bum maga de kan bau bungli a matu hkai lu hkai sha galaw nga ai buga masha ni matu, shimlam grai tsang ra ai madang du nga ai re.
Laiwa sai 2021 ning, July shata hta sha pyi, Nmawk hte Dawhpumyang mare lapran hta nga a Numlang mare na asak 51 ning kanu num langai hpe, Myen hpyendap ni hta roi rip nna hkauna pa hta sat da ai mabyin ni byin wa sai re.
Ya LungJa Bum npu na Wawang mare mash ani gaw, hpyen la ni hte rau, hkam da ai bawm ni hpe hkrit tsang ra ai majaw, dum nta wa n gwi shi ai re.
Wawang mare hta dum nta htinggaw 107 nga nna, ya gaw Nmawk ginwangdaw kaw nga ai hpyen yen dabang 4 hta hpyen koi yen nga ai re hpe chye lu ai.
Myen hpyendap ni kawn KIA Dap Ba 3 npu, Dap Dung 15 ginra rai nga ai Lungja Bum hpe zing la lu hkra, masing jahkrat nga ai masa re lam ginra masha ni kawn tsun maram nga ma ai re.
