Shiga

Putao Ginra Hta Shingra Tara Makawp Maga Ra Sai Lam, Ginra Masha Ni Tsun

Putao ginra, hkashi hkanu ni hta jak kaba hte nga kaba sha ai lam grau sawng wa ai majaw, nga ali n htum mat na matu jawm magawp maga ra nga sai lam, ginra masha ni tsun ai re.

Shingra tara hte tu matu hkrung mahkrung hpe makawp maga na matu, hpaji jaw ai lamang ni tang du hkra nlu galaw ai majaw, ya na zawn jak kaba hte nga hkwi sha ai lam grau law wa ai re nga, Putao ramma langai KNG hpe n dai zawn tsun dan ai re.

“Mali hka kaw, nga hpe manu mana, Jak kaba ni the ka ba nna, nga kaba ni grai shaw ai le. Dai hpe aging agang galaw taw ai, ya du n lu hkang zing taw nga ai. Nga hte seng na gaw hpaji jaw ai, ningmu jaw ai lam nau n galaw ai. Honda hte nan kaba ai. Mali hka de gaw, hpawng ni hte nan ka ba hkawm nna, Sung dik ai kaw nga ai pyi nau n mu ga ai nga kaba ni du hkra shaw dut sha taw ai. Dai majaw, Pipe the sha tam sha taw ai ni pyi n lu mat ai le.” Nga nna tsun ai re.

Moi gaw singawn kabai ai lam, sumri hte hkam ai lam ni sha galaw lai wa sai raitim, ya gaw yawng ngu na daram ka ba jak mari tawn sai majaw kadai mung n lu hkang zing mat ai lam re hpe chye lu ai.

Gawn hkang ai lam n nga yang chyawm gaw, du na 10 ning daram rai yang, nga taw mat wa na re lam, ginra rawt jat lam hta ding yang shamu shamawt nga ai ramma langai mung KNG hpe ndai zawn tsun ai re.

photo – green Khakabo

Putao, Nogmung, Ziyardam hte Hkalang mare hkan chyawm, ginra madu Rawang amyusha ni nan, makawp maga wuhpung ni hpaw let, Jak hte nga ka ba shaw ai lam ni hpe tsep kawp n galaw shangun ai sha, hkum pat tawn ai lam chye lu ai.

Mare salang ni nan, atsawm hkang zing ai rai nna, nga ka ba ai mu hkrup yang, jak zing la kau ya ai lam ni, tang du hkra ahkyak la, lit la ai lam ni galaw ai rai nna, tinang mare buga ginra hta poi lamang ni nga wa yang sha, jawm rim sha ai lam galaw ai majaw, dai ginra mayan na, hka shi hka nu hkan chyawm, nga ni grai naw chyai ai lam tsun ai re.

Putao ginra kata na, Mali hka, Mular hka, Hka-lang hka, dai hka shi hka nu hpe madung machyu nna, ginra masha ni kan bau nga ai re majaw, ginra madu ni nan makawp maga chye ai myit hte ladu lai jak ni the kaba shaw ai lam ni hpe, koi gam chye ra nga ai lam, matut hpaji jaw shadut tawn ai re.

Putao ginra gaw hkyen bum the shingra tara tsawm la ai ginra langai re majaw, hkrun lam hkawm chyai ai ni mung grai law ai rai nna, ginra mung shawa ni mung dai ni hpe machyu let sha kan bau ra nga ai rai nga ai.

dai zawn shingra hpe shamyet shanat nna, kan bau nga ai buga masha ni hpe, shingra jahten ai ladat n re sha, makawp maga chye ai ladat hte galaw sha chye na matu hpaji jaw ningmu ni jahpaw la na ra ahkyak nga ai lam mung rai nga ai.

Related Articles

Back to top button