Jak kaba Hte Ja Htu Ai Majaw Dabak Hka Hten Wa Sai

Myitkyina-Manmaw lam ntsa, Waimaw ginwang, Dabak hka hta ‘gung galang jak’ hte ja htu sha taw nga ai majaw, hkashi hte makau grupyin hten za taw sai lam, ginra masha ni tsun ai.
“Ya htu ding-ngam rai taw ai. Mung shawa ni gaw, kachyi mung n htu shangun mayu ai raitim, salang n kau gaw htu shangun, n kau gaw kachyi mung nhtu shangun mayu, dai lapran kaw rai nga ai. Hka n dai kaw sha machyu let yi, sun, hkau na mung, hkwi lu hkwi sha ai mung dai kaw sha, kan bau ai ni mung law law rai nga ai.” nga nna, Katsu mare na, kawa la langai KNG hpe tsun ai re.
Ndai hka gaw Gara yang, Katsu, Dabak dai mare 3 na mung shawa ni a kan bau bungli hta ahkyak ai hka re lam chye lu ai.
Dabak hka gaw shawng daw de san tsawm ai raitim, 2022 kaw nna, Dabak hka ka-ang hta nan jak kaba 3, jak sai hpawng 50 daram hte ja htu sha hpang wa ai majaw, hka lam ni yawng shai mat ma nna, hten za taw sai lam ginra masha ni tsun dan ai re.
Mare salang ni hte ahkaw ahkang lu ai ni nan, sut du ni hpe ja htu shaw na ahkang jaw da ai re majaw, ginra masha ni tsun ninghkap ai raitim, nlu ai lam chye lu ai.
Dai majaw, ya ten tinang buga dum nta de bai nhtang wa sai, Gara yang, Katsu, Dabak hpyen yen buga masha ni gaw, shanhte jai lang na hka yak hkak nga taw sai lam chye lu ai.
Miwa jarit kaw nna Waimaw Talawgyi Mali hka de lwi shang ai Dabak hkashi gaw, 2020 ning shawng daw, grai san tsawm lai wa sai re.
Raitim, ya gaw Katsu mare kaw na, Deng 1 ram gang ai hkalam lahta daw dingyang, htu sha tik tik rai taw ai majaw, hka shi yawng hkum put n tsin byin wa nna, hka lam yawng hten taw sai majaw, Ja htu ai lam lawan dawm jahkring nna, pru mat ma na ginra masha ni ninghkap hpyi shawn nga ma ai re.
Dabak hka shi ding yang, mare kahtawng 30 ram nga ai rai nna, mung shawa mun lam, ndai hka hpe sha machyu let, nga pra taw ai re lam chye lu ai re.