Myitkyina, Shadau jahkri ginra hta garum ntum ra nga

Shadau Jahkrai Ginra

Myitkyina, Shadau mare hta, Dinghkrai hku nna, Jahkrai ma ni hpe lakawn taw ai Tsaw Myit sha-it Jahkrai Dabang hta ya ten, Ma ni, rawng shingbyi na shara the, malu masha grai yak hkak taw ai lam chye lu ai.

Tinang nan, jahkrai kaw na yak hkak jam jau let, kaba wa ai Rev. Gelang Dau Dai the Sarajan Manam Mai Ja yen woi awn nga ai rai nna, Bum Ga, mare kahtawng hkan na, Jahkrai ma ni hpe lakawn taw ai hta, ya ten hpaji lam the malu masha ni ra ahkyak nga ai lam sara Rev. Gelang Dau Dai n dai zawn KNG shiga dap de tsun ai re.

“Hpa ji daw the seng nna, shanhte hpe madi shadaw na wa n lu taw ai le, byin mai ai rai yang gaw dai madi shadaw shangun mayu ai, bai nna, hpawt ni hpawt din gara hku byin wa na re n chye ai, mungdan wa n dai zawn rai na aten galu yak taw yang gaw lu sha daw maga ra wa na masa nga taw ai. Nga shara chyawm me gaw, Plastic ni wa mari na gin sum sha raitim, mai ai. Nye kasha ni yawng yak hkak, jam jau ai kaw na sa ai re majaw, kadai mung n nyi ma ai. No 1 gaw Hpaji daw, 2 gaw Lu sha daw, 3 chyawm la ma mai byin yang, ma ni a matu ginsum zawn re ni lu gap hkra ngu rai nga.”

N dai Jahkrai dabang hta, Jahkrai ma yawng 30 hkawt nga ai rai nna, dai ni gaw Chihpwi, Saw Law, Man Maw, Gwi htu, Gang Dau, Sama, Namti, Hukat, Ta Padawng, , Myitkyina the Waimaw hkan na myu baw sang hkum ai, naw ku hpung hkum hkra kaw na re lam chye lu ai.

N dai Jahkrai Jawng gaw, gara Wuhpung Wuhpawng kaw na, madi shadaw tawn ai lam mung n nga ai hpe, yak hkak ai lapran tsawra myit the matsan Jam jau ai jahkrai ma ni hpe lakawn nga ai re lam n dai zawn matut tsun ai re.

“Ngai na n dai Jahkrai jawng gaw, ngai nan, Sasana myit rawng ai majaw, Ma ni hpe tsawra ai. Ngai mung asak 11 hkan na jahkrai hkrai mat ai, nye madu jan mung asak 3 ning kaw na jahkrai hkrai mat wa ai, dai majaw an gaw lahkawng yen jahkrai kaw na kaba wa ai majaw, matsan mayen masha ni muk mari sha tim, hkum bai she kapya rai nna nga kawa wa ai hpe shingran mu myit dum majaw an lu ai hte hpe e, an kaji Ma prat na zawn, yak hkak jam jau ai ni hpe bau ga ngu nna, an la nan myithkrum nna, hpaw tawn da ai re, dai majaw naw ku hpung hte mung n seng ai, kadai lauban, company, gara mungdan kaw na lit la ai lam mung n nga ai sha,  Karai Kasang lit la let galaw taw ai hku rai nga.”

Matut nna, n dai zawn, Jahkrai ma ni hpe lakawn ai magam bungli a yaw shada lam the seng nna mung, matut tsun wa ai.

“Dinghku kanu kawa, Ka Ni Ya law ai, shabrang ni amyu a matu, sasana a matu Jai lang ging ai a ten hta e, Ka ni ya nau law wa, anhte shadau kaw mung dingre Lu sha hkum ai ni mung nga ai hpe myit dum, nye myit masin wag rai kahpra wa ai le. Dai majaw hpa mi rai rai, bum ga de sasana hkawm yang, Nang layang ga de nga ai wa, anhte bum ga na matsan jahkrai ni hpe gara hku pawn ba na, gara hku madi shadaw na, naw she myit yu yar rit nga ai ten hta, ngai na yaw shada ai lam gaw, anhte amyu sha ni sasana magam nnga, mung dan masa n nga, mungga hta galu gaba wa ai generation nga wa mu ga ngu nna, yaw shada let n dai zawn ap nawng wa ai hku rai nga. Myu sha ni a matu masha mung dum, ngai dang di ai the ngai hpung magam gun wa ai re majaw, mungga hku na mai byin ai the made, amyu a matu, mungdan a matu gaw gap na ngu nna an nu wa ni, lu lawm ai the made jawm mahkawng rai nna hpang wa ga ai re lo.”

Jahkrai ma ni hpe woi lakawn nga ai Rev. Gelang Dau Dai gaw Madung naw ku hpung kaw nna, hpung up magam gun langai rai nna, jahkrai jawng hpe 2017 kaw na hpang wa ai lam chye lu ai.

Ya na zawn mare kaba shinggan e jahkrai jawng hpe hpaw tawn ai rai nna, Myenhpyen dap daru magam n zing shi ai ten gaw, karum ningtum loi li du ai raitim, n dai hpang daw de garum ningtum n du sai re majaw yak hkak hkrum nga ai re lam chye lu ai

Read Previous

Putau e ma ti sha shut nna si ai mabyin ding yang byin nga

Read Next

Mungbaw ginra nbung laru hta dum nta nkau hten mat ai majaw, yak hkak taw nga

Leave a Reply

Your email address will not be published.