Bilateral gap hkat jahkring jahkrup nga dingyang ladaw, Myen hpyendap hte KIA gasat gala majan lam gaw Jinghpaw Mungdaw ga-ang hta June 29, bat Langai Ya shani, byin hpang wa sai.
Wunpawng Mungdan Shanglawt Hpyendap, KIA Dapba (8) npu Dapdung (5), Ga Hkyeng Bum ginra de Myen hpyen hpung lahkawng htu shadut shang wa ai majaw, La Mai Yang kaw aten minit 30 daram hkrum katut gap hkat lam byin wa sai nga, KIO shiga lawk tsun ai.
“Myen ni gaw dai kaw htu shadut shang wa ai majaw aten kadun gasat poi byin ai. Laja lana gaw n re. Tinang KIA dap ni bawm 2 lang, 3 lang kapaw rai, gap mung loi gap rai nna yen kau da ai,” nga nna KIA hpyendu langai tsun ai.
KIO The Kachin Net June 29 shiga hta, “gasat gala byin ai gaw KIA Masat (5) Dap Dung ginra kata de htu shadut nga ai Hk.M.Y (389) hpyen hpung ni hpe hpyen garum sa wa ai Hk.L.Y (237) hpyen hpung hpe KIA hpyen hpung ni hkap shingla gasat ai majaw byin ai re” nga tang madun ai.
June 22 hta mung, Loije makau Myen-Miwa ga jarit lam langai kaw hkap sin ai KIO COVID-19 ana zinli jep chyam shagyit hpe Loije Myen hpyendap ni wa hpya jahten kau ai majaw, dai shani KIA Dung (1) hte ganoi gap hkat na zawn hpyen masa shaja hkat wa sai re.
Ndai shata praw kaw nna, Lahta Sammung KIA dap ni gaw Myen hpyen ni a hkan tam majan baw gasat hkrum hpang wa ai re. Myen Tat-ma (88) hte (99) pawng hpawm hpyen hpung ni hte KIA dap ni gaw, Muse ginwang Htan Hpa Bum kaw June 6-7 hte, Kutkai ginwang Kaleng ginra hta gaw June 16 kaw nna 21 ya du hkra, gasat gala majan ni byin wa sai re.
Mungdan kata COVID-19 ana zinli makawp ninghkap lamang galaw nga ten, tatmadaw gaw jahten sharun hpung ngu masat tawn ai, Rahkai AA hte byin nga ai majan hta lai, ngam ai rawt malan hpung ginra ma hkra kaw, May (10) kaw nna August (31) du hkra majan jahkring tawn ai lam, May (9) hta ndau dat sai rai nga ai.
Raitimung, tatmadaw gaw Lahta Sammung kaw ‘ginra jasan’ galaw ai shaloi KIA hte ‘hkrum katut gasat poi’ byin ai lam tsun ndau ai gaw n jaw ai hte, kaja wa gaw masing nga nga hte galaw ai ‘htu gasat majan’ she re nga nna, Laiza KIO Shiga Magam Dap lithkam, Du Kaba Nhpang Naw Bu, dinglun ai re.
