Jinghpaw mungdaw sinpraw, Myen-Miwa ga jarit pru-shang lam, KIO COVID-19 ana jep shagyit hpe, Loije Myen asuya dap gaw June 22, bat Langai Ya shani, hpyen hpung hte sa zing hpya jahten kau ya sai re.
Ndai shagyit hta, KIO hkamja dap magam gun ni hte mungmasha tsi magam gun ni nga nna, lai hprang pru-shang masha ni hpe COVID-19, Coronavirus ana kap n kap tsi jep ya ai lam hpe, lai wa sai March shata daram kaw nna galaw nga ai rai nga ai.
“Nang, Loije hte Lana Zup lapran kaw Miwa mung hku nna, nang Nba Pa maga de rap ai lam langai na hka mahkrai gate (shagyit) kaw re. Hkamja dap masha ni dai kaw sa nga ri nga ai. Re yang she, daini (June 22) gaw, nang Loije kaw na Myen ni sa na sa dawm kau, yawng sa run kabai kau ya ma ai,” nga nna shimlam tsang ra ai majaw mying n tsun mayu ai ginra masha langai tsun ai.
Myen mung aten, jahpawt daw hkying 9:30am daram hta Myen hpyen ni ya na zawn galaw nna dai shagyit kaw shana maga du hkra wa nga ai ten, Nba Pa de na lung wa ai KIA Dung (1) hpyen hpung du na mahka bai htingnut ya ai re.
“Myen ni, hpyen hpung hku sa nna sa jahten kau ya ai majaw, htaw KIA Dung (1) na hpyenla ni mung, marai manga kru shi daram lung wa, shana daw de, dai kaw Myen ni gaw shani ting wa nga kau da na htaw ra (Dung 1) ni du n du rai ten hta, bai wa mat ai da”, nga nna lahta na salang wa tsun ai.
Dai shani ganoi ganoi gap hkat wa ai hpang, matut nna hpyen masa jahta hkat ai masa naw re lam sagawn chye lu ai.
Ndai June hta praw kaw nna, Lahta Sammung, Muse hte Kutkai ginwang lahkawng kata KIA dap daju ni hpe Myen hpyen ni sa htim gasat ai lam ni, ndai bat du hkra, galaw nga ai re.
Mungdan kata COVID-19 ana zinli makawp ninghkap lamang galaw nga ai ladaw, May (10) kaw nna August (31) du hkra, jahten sharun hpung ngu masat ai, Rahkai AA hte byin ai majan hta lai, ngam ai rawt malan ginra ma hkra gaw, majan jahkring ai nga nna tatmadaw Myen hpyendap gaw May (9) ya shani ndau sai re.
Myen hpyendap maga, Lahta Sammung e “ginra jasan” galaw ai shaloi KIA hte hkrum katut gap hkat hkat re ai masa she re nga, tsun timung, teng sha gaw masing nga nga hte “htim gasat majan” galaw wa ai re nga nna, Laiza KIO Shiga Magam Dap lithkam Du Kaba Nhpang Naw Bu tsun ai re.