Jinghpaw mungdaw Hugawng Pa e ginra masha ni hte Pat Jasan Hpung ni ginrun let kani sun hkyen ai lamang lai wa sai shata kaw nna galaw hpang nga sai re.
Hugawng Pa Warazup mare sinna ginra, Mugawng hka, Nam Hpyet hka hte Shahtuzup mare dingdung daw ginra ni hta kani yi eka (20) jan hpe hkyen shamyit sai lam Warazup mare salang Naw Di kaw nna Jinghpaw Shiga Dap KNG de tsun ai re.
“kani yi nga ai shara ni hpe tam nna hkyen ai. Mare masha ni hte kani lu sha ai ni pawng nna hkai da ai re. Kani nre sha, kaga grai mai hkai ai” nga nna nna tsun ai re.
Hugawng Pa e shaning shagu ndai ten Kani hkyen ai lamang hpe dingyang galaw nga ai rai nna, dai ning mung masha n gun marai 100 daram hte Pat Jasan galaw nga ai lam chye lu ai.
2019 Wunpawng Mungdan Shanglawt Hpung KIO a kani hte seng nna shapraw ai sumtang hta, Jinghpaw mungdaw e kani hkai ai shadang law htum shara ni gaw Myen asuya hpyendap npu Pyithusit hte BGF ginra ni hta re lam tang madun tawn ai re.
Ginra hku yu ga nga yang Kambaiti, Sadung, Danai hte Sumpra bum ni hta rai nna, lahta Sammung malawm rai yang kani sun hectares 6918 mu ai lam tsun da ai re.
