Myen asuya dap hte KIA lapran Myitkyina-Manmaw lam Nam San Yang, Pause Bum kaw bat Manga Nov. 29 ya shani, aten kadun gap hkat ai lam byin wa sai.
Laiza na KIA shiga lawk hku chye lu ai hta, tinang KIA maga hpyenla langai hkrat sum nna sinat langai mung shayaw kau ai lam, Jinghpaw Shiga Dap KNG de tsun shateng ai. Raitim Myen hpyendap maga na si hkala shiga n chye lu shi ai.
Aten 11 a.m. jan hta, asuya dap Hk.L.Ya Masat 140 hte KIA ni, man hkrum gap hkat ai re nga, KIA Shiga Lawk tsun ai re.
Laksan KIA Ginjaw Makawp Dapba (5) a Pause Bum post gaw, Laiza numshang Nam San Yang mare a sinna maga nga ai re.
Myen hte Wunpawng Mungdan Shanglawt Hpung (KIO), wuhpung lahkawng dap lapran gap jahkring sen htu ai lam n nga tim, maning 2018 htum wa ai aten kaw nna gasat gala majan ni n nga mat ai daram yawm taw ai re.
Raitim, KIO shanglawm ai Dingdung Daw Daphpawm na kaga hpunau hpung masum (Rahkai AA, Balawng TNLA hte Kokang MNDAA) ni hte gaw, Lahta Sammung hte Rahkai mungdaw ni hta gasat gala majan ni dingyang byin nga ai rai nga ai.
Myen asuya hte DDD wuhpung mali lapran, ndai November shata laman ‘bilateral’ gap hkat jahkring na lamang jahta na hkyen da ai lam nga timung, ya shata htum wa ten du hkra n lu hkrum shi ai re.
