Myen ni sinat kaba gap ginjang ai majaw, KIO masat nhtoi n lu galaw

Lahta Sammung shawnglam ginra langai kaw mu lu ai, KIA hpyenla langai.

Lahta Sammung KIA Dapdung (8) ni KIO masat nhtoi galaw na hkyen da ai mare de Myen hpyen hpung ni lung wa nna laknak kaba manu mana gap ginjang ai majaw, lamang n lu galaw byin mat ai lam, mare masha ni hku chye lu ai.

Oct. 25 ya shani ang ai (59) ning hpring Wunpawng Mungdan Shanglawt Hpung (KIO), masat nhtoi lamang hpe Namtu ginwang Bang Gaw mare kaw galaw na Dung 8 ni hkyen da ai re.

“Dung 8 ni gaw shanhte dai KIO masat poi galaw na mare de Myen ni laknak kaba nau gap bang ai majaw poi n lu galaw la mat ai. Mare masha ni yawng hprawng mat ai majaw” nga nna Lahta Sammung KIA shiga lawk tsun ai.

Myen hpyen hpung ni gaw Oct. (23) kaw nna KIO masat nhtoi galaw na Bang Gaw mare de htu chyawm wa nhtawm, masat nhtoi shani n du shi yang, dai mare de sinat kaba gap bang ai re lam, matut chye lu ai.

KIO Ginjaw Komiti tingnyang up, Dukaba Nban La a masat nhtoi mungga hta gaw, “Hpyen wa hte gap hkat jahkring da nhtawm hpyen yen mungshawa ni hpe tinang a buga de nhtang wa nga lu na matu shakut nga ai lam” ndau ai re.

1960, Oct. 25 ya shani, dai ten “Jinghpaw Mungdan Shanglawt Hpung” ngu ai, Kachin Independence Organization hpe Lahta Sammung, Lashio mare kaw Yangon Jinghpaw Wunpawng dakkasu jawngma ni woi hpaw ai re.

0 Reviews

Write a Review

Read Previous

KIO a Hpyen wa hte gap jahkring na lam ntsa hpyen yen ni ung ang

Read Next

Syria hta asak ap nawng wa sai Du Jum Sumhka Zau Seng

Leave a Reply

Your email address will not be published. Required fields are marked *