KBC Ningbaw: Myen hte bilateral sen htu na KIO jin jin rai nga sai

KBC Ningbaw Rev. Dr. Hkalam Samson (pai) hte Myen mung hpyendap chyawm tari, Dukaba Min Aung Hlaing hte Mandalay hta Sept. 12, 2019 hta hkrum shaga hkat yang

Wunpawng Mungdan Shanglawt Hpung (KIO) gaw, Myen asuya (hte hpyendap) hte bilateral gap hkat jahkring ga sadi sen htu na matu jin jin rai nga sai lam, KBC Ningbaw tsun wa sai re.

Ndai lam hte seng nna Oct. 19 bat Kru Ya shani Jinghpaw Wunpawng Hkalup Hpung (KBC) Ningbaw Rev. Dr. Hkalam Samson kaw nna Jinghpaw Shiga Dap (KNG) de tsun ai re.

Sara Samson gaw, ya kalang bai KIO bilateral gap hkat jahkring na lam ntsa shi a ‘madi shadaw ai snr ninghkap ai’ ningmu lama ma tsun na nyet kau ai rai nna, ndai lang hpa n tsun zim sha nga na re lam tsun ai re.

Lai wa sai 2015 hta gaw, KIO kaw nna NCA (Nationwide Ceasefire Agreement) sen n htu na matu KBC gaw masha hkum nan sha n ga ndau shabra laika hku nna mung ja ja ninghkap wa sai re.

Ndai October shata htum wa de shing n rai ya kalang bai KIO hte Dingdung Daw Daphpawm hpung (3) ni Myen asuya hte hkrum ai shaloi, bilateral gap hkat jahkring ga sadi sen htu na matu hkyen da ai lam, KIO ginjaw salang ni tsun ai re.

Ya ten du hkra gaw, Hkatawlik nawku hpung ginjaw gaw bilateral gap hkat jahkring ai lam hpe madi shadaw ai masa nga tim, KBC a masa gaw hkrak n chye lu shi ai re.

Myen mung asuya hte tatamadaw hpyendap ningbaw ni gaw, Jinghpaw nawku hpung ningbaw ni hpe hkrum shagu, KIO hpe NCA hkapla sen htu na matu galoi mung dip n-gun jaw nga ai re.

0 Reviews

Write a Review

Read Previous

KIA Ginjaw Shimlam Dap de Myen ni sinat majoi gap sharu

Read Next

Daphpawm na gale nhtawm KIO hkrai bilateral sen htu sana kun?

Leave a Reply

Your email address will not be published. Required fields are marked *