Jinghpaw mungdaw hte Miwa mung ga jarit sut hpaga ginra lawan gaw sharawt na matu ahkyak ai nga nna, mungdaw hkringmang daju tsun ai re.
Tinang mungdaw mungshawa ni nga mu nga mai na matu Miwa hte ga jarit rai nga ai Pangwa, Kampaiti hte Loi Je jarit ni hta sut hpaga ginra tara shang hpaw na re nga nna hkringmang salang daju Dr. Hkyet Awng tsun ai re.
“madung gaw Miwa mungdan ai gat lawk sut hpaga hpe machyu nna, anhte mungdaw a matu yi hkauna pru ai gunrai ni hpe grau manu lu hkra (value added) galaw nna, Miwa mung de ga jarit kaw nna shalai dut lu yang, anhte mungdaw mungshawa ni a sut hpaga lawan rawt jat wa na re. Dai re majaw mungdan lahkawng ga jarit sut hpaga jawm galaw ai lam gaw ahkyak nga ai. Lawan ladan mung galaw ra nga ai.” nga nna tsun ai re.
Ndai masing a matu MOU lekmat htu ngut da sai lam, October praw 4 ya shani Jinghpaw mungdaw asuya rung e bawngban ai hta munghpawm sut hpaga hkringmang salang Than Oo tsun mat wa ai re.
Mungdan 2 lapran, ga jarit sut hpaga dabang galaw na re majaw, mungdan lamu ga jarit masat masa ni hpe atsawm sha bai shadawn ra na ahkyak ai nga nna tsun ai re.
Jinghpaw mungdaw asuya gaw shi a ladaw 2 ning laman, mungdaw kata rawt jat masing galaw ai rai nna, ngam ai 2 ning hta gaw mungshawa ni a ngamu ngamai lam hpe madung dat galaw mat wa na lam mungdaw hkringmang daju Dr. Hkyet Awng tsun mat wa ai re.
