Inglik ningtawn ai Dr. Hka Lum, wun doi mat

Rev. Dr. Lachyam Hka Lum, asai 67, gaw Oct. 5, 2019 hta wun doi mat wa sai

Shawng daw Myen hpyendap asuya uphkang ai ladaw, Inglik laika ningtawn ai hte n law la ai Chyum doctor janmau gup la ai Jinghpaw Wunpawng ni hta shanglawm ai Rev. Dr. Lachyam Hka Lum gaw Madu Yesu hta yup pyaw mat wa sai re.

Myitkyina, Shwezet dum nta hta e October praw 5, bat Kru Ya shani jahpawt daw sara Hka Lum, shi a asak 67 ning hta, n nga mat wa ai re.

Sara gaw, Karai magam hta sha n ga Inglik laika hta mung grai ningtawn ai majaw Inglik laika sharin ai lam hte Inglik hpe Myen hku, Jinghpaw hku ga gale ai lam hpe mung galaw wa sai re.

“Sara kaba Dr. Hka Lum gaw anhte Wunpawng amyusha ni hta hpaji hta ningtawn ai langai mi lawm ai ngu nna ngai mu mada ai re. Shi hta atsam marai grai nga ai, grau nna Inglik laika hpaji hte seng nna laklai ai ningtawn ai langai re.  Shi hpe gaw anhte a wuhpung wuhpawng ni jai lang ai ningra ai ngu na mung mu mada ai. Shi n nga mat wa ai grai sum kaba re” nga nna, Jinghpaw Mungdaw Mungshawa Pati (KSPP) a pran wan ningshawng komiti, Ningtau Ningbaw, Duwa Gumgrawng Awng Hkam, tsun ai re.

Dr. Hka Lum gaw Myitkyina, Jinghpaw Wunpawng Hkalup Hpung Ginjaw, KBC rung hta amu gun wa sai zawn Jinghpaw Wunpawng Chyum Hkawlik KTC e mung sharin sara tai wa sai re.  Maga mi de mung, ya shi a asak htum ai aten du hkra, Inglik laika sharin ai lam hpe galaw nga ai re.

Matsan ai kun dinghku hte kahpu kanau law ai majaw, Dr. Hka Lum a ramma prat hta sai-ka kabe let mung laika hpaji shakut wa ai hta Doctor of Ministry janmau hpe gup la lu ai gaw sakse rai nga ai.

Read Previous

Mali zup madim masing a majaw htawt sit ginra masha ni dum nta hten run

Read Next

Miwa asuya, pati salang ni hpe US visa pat hkum

One Comment

  • Sara Kaba Hka Lum kaw lahpa galai na ramma ni law law ra nga ai hpe mu mada ai! Aten du majaw Karai Kasang woi la sai rai tim anhte myu sha ni yawng matu manu dan la ai Sara Kaba langai bai yawm mat ai majaw nta masha ni hte rau yawn hkyen nga ga ai law🙏🙏

Leave a Reply

Your email address will not be published. Required fields are marked *