Mungdaw majan tsin yam 8 ning jan hkrum sha nga ai hpyen yen ni a shawnglam hte seng nna Jinghpaw Wunpawng Hkalup Hpung Ginjaw KBC kata hpyen yen lit hkam ni gaw 2 ya tup bawngban wa sai lam chye lu ai.
August 19-20 ya shani KBC ginjaw rung e galaw ai bawngban hpawng hta hpyen yen dum nta wa na lam hte seng nna nbung ai ningmu ni hpe bawngban sai lam KBC bawngring dap lit hkam Sara Hpauyam Hkali ndai zawn tsun ai re.
“Hpyen yen 8 ning jan sai re majaw gara hku shawng de matut sa na. Ya ten nkau gaw dum nta wa mat sai. Nkau chyaw gaw kam mai ai wuhpung wuhpawng langai ngai woi wa na hpe la nga ai. Nkau gaw dum nta nwa ai sha ndai kaw matut nga na tsun ai.” Nga nna tsun mat wa ai re.
Lahta Sammung e mabyin laja lana bai byin wa ai zawn, lama Jinghpaw mungdaw e majan bai byin wa yang hpyen yen ni a lam gara hku matut galaw na hpe mung bawngban mat wa ai lam tsun dan ai re.
2 ya tup galaw mat wa ai hpyen yen ni shawnglam masing bawngban hpawng hta KBC ginjaw kata hpyen yen dabang shara shagu na lit hkam ni sa du bawngban ai hpe mu lu ai.
Jinghpaw hpyen yen ni tinang dum nta de sari sadang hpring hpring, shimlum ai hte wa lu na matu Jinghpaw hpyen yen lahkawn lanawn hpung KHCC hte asuya wuhpung ni bawngban nga ai re.
