Myitkyina, Hugawng Pa ginra lahkawng na nawku hpung pat jasan komiti pawng nna Jinghpaw Mungdaw kata Hugawng Pa, Danai ginwang e kani yi eka 2,236 hpe nhtoi 19 ya laman jahten kau ya lu ai lam chye lu ai.
Kani yi hkyen kau ya ai shara ni gaw Danai mare a sinna maga deng 20 tsan ai shara Tawang, sinna dingda daw Tarung hte Danai Hka hkahku mayan Gangdau Yang na yi ni re lam pat jasan hpung kaw lawm ai Slg. Tailum La Ring tsun ai.
Dai zawn kani yi hkyen ai hpung ni du ai ten, yi madu ni lapran mayak mahkak ni hte jahkrit shama ai lam ni mung hkrum mat ai lam tsun ai.
“Ninghkap ai masha law malawng re. Tarung kaw nga yang Rahkai hpu nau marai 10 sinat hte gwi gwi sha ‘sa wa mu gap sat kau na’ nga nhtawm anhte sa wa ai lam hkan laika ka da ai. Nkau gaw gap na matu shingding da ai lapran kaw Wa Karai Kasang a chye chyu hte sha anhte ni bai du yang hprawng yen mat ma ai”
Jinghpaw mungdaw kata hkristan hpung ni yawng hpawngchyawm da ai pat jasan ginra— Myitkyina, Waimaw, Mugawng, Hpakan, Danai Hugawng na ap nawng masha 500 jan hpe uhpung 3 hpaw ninghtan nhtawm pat jasan hkawm mat ai lam dai hpung kawn chye lu ai.
February 12 ya shani kawn March shata praw 2 ya shani du hkra kani yi nga ai shara hkan e lung nna hkyen jasan mat ai hta awngdang hkra galaw la lu nhtawm hkrunlam lapran Lawa mare kawn amyu shayi masum mung masing ngut kre ai kaw du hkra shanglawm mat ai lam pat jasan komiti malawm ni tsun ai.
Jinghpaw Mungdaw kata e lai wa sai lahkawng ning daram du hkra nanghpam tsi mawan dut mari hpaga galaw ai ni wanglu wanglang galaw wa nga nhtawm ka-ni hkai ai lam mung naw nga nga ai lam a majaw nanghpam tsi mawan ni hpe aloi loi sha mai lu ai zawn, Jinghpaw Wunpawng myu sha ni lapran ramma pang ni hta nanghpam lu sha jai lang shadang law wa nna mara tawtlai ai lam ni law wa ai majaw nawku hpung ni woi awn let kani nanghpam pat jasan hpung hpaw shabawn let maning kawn pat jasan masing n-gun dat galaw ai rai mali ai.
