7 lang na UPWC hte NCCT ni hkrum shaga ai lam, March shata ka-ang hta galaw na

Munghpawm Simsa Lam Hkrang Shapraw Komiti (UPWC) hte Mungdan Ting Gap Hkat Jahkring Bawngban Jahkrup Hpung (NCCT) ni du na March shata ka-ang ram hta 7 lang ngu na gap hkat jahkring bawngban jahkrup hpawng galaw na matu lahkawng maga myit hkrum da sai nga chye lu ai.

“UPWC hte NCCT ni 7 lang ngu na hkrum lu hkra tau hkrau bawngban jahkrup ai daw re. Zuphpawng lamang galaw na aten, bawngban mat na daw shan ni le. March shata ka-ang ram hkan hkrum lu na re ngu gaw lata da sai. 12 kawn 16 ya dai lapran hkan gaw hkrum na matu lata san da ai” nga Badu Koi Htu Win kawn tsun ai.

NCCT hte Myanmar Peace Center (MPC) ginjaw kawn dat kasa ni February 21 ya shana daw hkrum shaga nhtawm myit hkrum ai lam lu la ai lam rai nga ai.

Du na February 27, 28 hte March shata praw 1 ya ni hta NCCT ni zuphpawng galaw ngut ai hpang March shata 12 ya a hpang daw Yangung myu na MPC rung hta 7 lang ngu na hkrum shaga bawngban hpawng galaw na matu myit hkrum ai lam lu la mat ai nga MPC kawn ntsa tsang salang Slg. La Mawng Shwi tsun ai.

“7 Lang ngu na bawngban hpawng hpe galoi she Yangung e galaw lu na kun ngu ai lam sha re. Ya hpang jahtum anhte ni hte shanhte chye na hkat da ai lam gaw NCCT a zuphpawng hpe 27, 28 hte March shata praw 1 ya shani hpe Htai Mungdan Chiang Mai kaw galaw na matu lata san da sai. Anhte bungli hpung ni chyawm gaw shanhte saw shaga da ai majaw Slg. Awng Min hpe shiga shana nhtawm 28 ya shani ndai de bai sa nna kahtap sanglang dan na. Dai ngut ai hpang March 12 ya shani hpang daw she Yangung kaw bawngban hpawng ni galaw na. Ngu mayu ai gaw aten lahkawng maga masat lu sai ngu mai tsun ai” nga shi kawn tsun ai.

Munghpawm Nhtoi hta laknak hpai hpung nkau hte simsa lam hte gap hkat jahkring ga sadi lata masat ka ai lam ntsa kalang bai sanglang dan ai lam hpe NCCT gaw masa hku nna myit hkrum ai raitim kahtap bawngban jahkrup na matu naw ra rawng ai nga shi kawn matut tsun ai.

NCCT maga kawn Nai Han Ta, Badu Koi Htu Win, Dkb. Gun Maw, Slg. Htun Zaw, Dkb. La Awng, Dkb. Sin Wa ni sa du nhtawm MPC maga kawn Slg. La Mawng Shwi, Dr. Min Zaw U, Slg. Nyu Ung Myit ni hte hpawn marai 5 sa du mat ai lam rai mali ai.

February praw 5 ya shani Htai Mungdan Chiang Mai mare hta Slg. Awng Min woi awng ai dat kasa ni hte NCCT dat kasa ni hkrum shaga nhtawm February 12 ya hpang daw na bat laman she hkrum shaga bawngban na matu myit hkrum da sai raitim NCCT maga masha n hkum ai majaw hkrum shaga lu ai lam rai n nga ai.

Exit mobile version