Tag Archives: KSPP

Shiga

KSPP Pati asak matut hkra, Myen Hpyendap npu mying jahpan bang na matu dawdan

Leave a comment

Kachin State People’s Party KSPP gaw, daru magam zing da ai Myen hpyen dap ndau da sai hte maren, Pati asak matut lu hkra matut galaw sa mat wa na matu myit hkrum daw dan dat sai lam chye lu ai.

February praw 2 hte 3, lahkawng ya galaw ai, No. (2) lang na Pati hkrum ra zuphpawng hta, KSPP Pati hpe, Myen hpyen dap daru magam zing kau ai hpang bai hpaw shabawn da ai Ra lata poi Commision hta mying jahpan bai bang na matu daw dan ai lam Pati a ningbaw ningnan Slg. Nshang San Awng gaw RFA Jinghpaw Nsen lamang hta tsun da ai re.

“Ralata poi ni hpa n myit shi ai, bungli langai galaw yang သက်တမ်း htum yang သက်တမ်း bai တိုး ai dai သဘော sha re. Da sang grai wa စီးရုံးရေးဆင်း ai lam ni gaw hpa n galaw ai, myi na Party mung masa hku sha matut sa na hku na သက်တမ်းတိုး dat ai sha re. Ra lata poi hte seng na gaw anhte hpa mung rai n myit shi ai, သက်တမ်း ngu gaw Asuya galai wa shagu galoi ma bai galai ra ra re baw nga taw nga ai. Party hpe nan gaw anhte n a yai kau ai sha bai jahkrung da ga ngu ai madang hku re” nga tsun ai re.

Lahkawng ya galaw ai Pati hkumra hpawng hta, ningbaw galai gachyai sai rai nna, Pati ningbaw Dr Manam Tu Ja a shara hta, Slg. Nshang San Awng galai wa ai re lam chye lu ai.

Mung masa pati ni hkan sa ra ai tara upadi hpe Myen hpyendap gaw lai wa sai January 26 ya shani ndau dat sai re.

Tinang mungdaw kata hta, tinang amyu yawng hpe gawng malai tai lu ai mung masa pati langai nga ging nga ang ai the, rawt malan ai ni mung rawt malan magam bungli hku shakut na, mung masa pati galaw ai ni mung nga ra ai lam hte seng na Slg. Nshang San Awng gaw RFA Jinghpaw Nsen hta ndai zawn matut tsun da ai re.

“ Shara shagu gaw tinang myusha bungli lam yan galaw na matu sha re. tinang ding gyeng bungli galaw na nga yang Party ထောင် na lam mung n nga ai, hpyen dap hte pawng mat wa na lam sha nga ai. ya anhte hpyen dap hte mung tsep kawp n pawng ga ai re. re majaw gaw, anhte gaw anhte a mungdaw kaw yawng a gawng malai tai lu ai party langai nga ra ai. nga taw nga ai hpe mung anhte a lata hte ayai kau ai hku n galaw ai, dai hku na tsap na, rawt malan ai ni mung shan hte lagaw hte shan hte amyu sha lam yan hpe shan hte jin ai hte shakut, anhte mung lu shakut ai ram shakut ga ngu mayu ai.” nga tsun ai re.

Mungshawa ni hpe sat nat ai Myen hpyendap woi galaw hkyen ai ra lata poi hpe tsep kawp ninghkap na matu, Myen mung kata rawt malan hpung law malawng ndau ai lam galaw hpang nga sai re.

Wunpawng Mungdan Shanglawt Hpung KIO chyawm gaw Myen hpyendap a 2008 gawda tara npu byin pru wa ai mungmasa pati hte laknak lang wuhpung ni hpe Hpyen hku nna masat ai lam, Kachinnet hta ndau ga lai was ai re.

Asuya, Shiga

Hkringmang Daju hte Rapdaw Ningbaw magam lit hpe Party garan shatsam na matu tang shawn

Leave a comment

Mungdaw Hkringmang Daju hte Rapdaw Ningbaw magam lit ni hpe party garan shatsam na matu NLD hte ra lata poi dang ai amyusha bawsang party na dat kasa ni a January praw 1 (dai ni) hkrum zup ai hta bawngban ai hpe chye lu ai.

1947 ning Pang Lung ga sadi hpe mahta ai Federal mung masa byin lu hkra Asuya uphkang dap (Executive) hte Upadi ka lajang rapdaw (Legislature) magam lit hpe nbung ai party hpe garan shatsam na matu tang shawn ai lam KSPP party ningbaw Dr. Manam Tu Ja tsun ai re.

“Federal hta upadi ka ai rapdaw, uphkang magam dap hte tara jeyang ai dap nga nna nga ai. Madung gaw upadi ka ai hte uphkang ai ahkang aya gaw ta tut hta grai ahkyak ai. Ndai lahkawng hpe shada rap ra hkra gawn jep na ahkyak ai. Hkringmang Daju hte Rapdaw Ningbaw lit hpe party garan na matu ningmu tang shawn da sai re” nga nna tsun ai.

Myitkyina, Amyusha Democracy Ginjaw Party NLD Rung e January praw 1 ya shani hkrum zup hpawng hpe NLD maga marai 3 committe rai nga ai Dr. Aung Moe Nyo, Nan Khin Htwe Myint hte Slg. Nhtung Hka Naw Sam ni woi awn ai rai nna, mungdaw hkringmang daju Dr. Hkyet Awng hte Rapdaw Ningbaw yan mung shang lawm ai re.

Lai wa sai 5 ning tup hta Jinghpaw mungdaw hte kaga mungdaw ginra law law e, rapdaw ningbaw hte ningtau ningbaw lit yawng hpe NLD hkrai lit la galaw nga ai re.

Jinghpaw mungdaw e ra lata poi dang ai amyusha party na dat kasa marai 10 nga ai raitim, dai ni na hkrumzup hpawng hta KSPP na marai 3, Du lay party na marai 2, NDP(K) na marai 1 hte sha shang lawn ai re.

NLD maga amyusha baw sang party ni hte hkrumzup na matu tsun da ai raitim, ndai kalang hkrumzup ai gaw Party to Party nre ai sha, ra lata poi dang ai dat kasa ni hkrai san san hkrum zup ai lam sha re hpe chye lu ai.

KSPP pawng hpawm party hku nna mung ndai hkrum zup ai lam gaw party a gawng malai nre sha, dat kasa ni a ningmu sha re nga nna tsun ai re.

Shiga

Ra lata Poi 2020: Jinghpaw Mungdaw KSPP shingjawng shara 67 hpe shagrin

Leave a comment

Jinghpaw Wunpawng pawng hpawm pati, KSPP gaw du na November ra lata poi kaw Jinghpaw Mungdaw rapdaw shara yawng 67 hta shang shingjawng na re lam, pati ningbaw ni tsun shagrin sai.

Kachin State People’s Party gaw Mungdaw kata amyusha rapdaw, mungshawa rapdaw, mungdaw rapdaw hte laksan amyu baw hkringmang (ye-ya wun-gyi), yawng shara 70 nga ai kaw ma hkra hta shingjawng na shawng e hkyen da tim, shara 3 kaw n lu shingjawng ai lam rai nga ai.

Dai shara ni gaw Saw Law mungdaw rapdaw shara, hte laksan amyu baw hkringmang shara lahkawng— Rawang hte Lisu re. Saw Law hta matut mahkai hte hkawm sa hkawm wa grai yak hkak ai majaw aten dep dat kasa mying jahpan bang na hpang hkrat ai majaw n lu shingjawng ai rai nna, Rawang hte Lisu ye-ya wun-gyi shara yan hta gaw kadai myit n lawm ai majaw re nga nna, KSPP Ningtau Ningbaw 2, Duwa Gumgrawng Awng Hkam sanglang dan ai re.

Jinghpaw Mungdaw ningpawt pati yawng 7 ra lata poi shang na hta KSPP gaw dat kasa law dik hte madung pati re.

Ngam ai, Sam Hkyeng TNDP (Tai-leng Nationalities Development Party) gaw shara 30, Lisu LNDP (Lisu National Development Party) gaw shara 23, Kachin National Congress (KNC) gaw shara 17, Zahkung Ting Ying a NDPK (New Democracy Party-Kachin) gaw shara 11, Lhaovo (Maru) LNUDP (Lhaovo National Unity and Development Party) gaw shara 5 hte Sam Hkyeng SSP (Shanni Solidarity Party) gaw shara 5, ni hta re.

Pati hku nna mali, masha hku nna pati kru hte pawng gahkyin ai KSPP gaw madung asuya daru magam lu NLD (National League for Democracy pati) hte hpyendap hkri dun USDP (Union Solidarity and Development Party snr Hkanghkyi pati) yan hpe shingdaw shingjawng na hkyen da ai re.

Du na Nov. 3 ra lata poi a matu, Jinghpaw Mungdaw kata, KIO uphkang ginra n lawm ai sha, asuya uphkang ginra ginwang (myu-ne) yawng18 hta e me (sin dan pa) jaw lu ai masha jahpan wan mi jan nga ai lam, Jinghpaw Mungdaw Ra Lata Poi Komishin hku chye lu ai.  Lai wa sai 2015 ra lata poi ten hta gaw me jaw lu ai masha jahpan 870,000 nga ai re.

Shiga

Myen Ralata Poi Nov. 8 hta galaw na ndau

Leave a comment

Myen mung a pati hkum ralata poi hpe Nov. 8, Laban, hta galaw na re lam, Munghpawm Ralata Poi Komishin kaw na July praw 1 hta ndau dat sai.

Mungdan kata hpyendap asuya kaw nna mungshawa asuya hkrang de galai wa ai 2010 kaw nna ndai lang hte 3-lang pati hkum ralata poi kaba galaw na re. Shawng na ralata poi lahkawng kaw sin dan pa (me) dang nna asuya galaw lai wa sai pati ni gaw, 2010-2015 kaw USDP (Hkanghkyi Pati) hte 2016 kaw nna ya ten du hkra gaw NLD pati re.

2010 ralata poi hta, hpyendap hte hkridun ai USDP pati gaw n tara ai masa hte me adang la ai masa raitimung Jan. Awng San Su Chyi woi ningbaw NLD gaw 2015 ralata poi hta madi shadaw me law dik hte, dang ai re.

Ya masum lang na ralata poi hta gaw, gara pati kaba mung, pati langai hkrai asuya hpaw lu na daram me dang lu na masa n nga ai majaw, pati pawnghpawm asuya (coalition government) pru wa na masa hpe mungmasa yu maram ni sawn tawn ai.

Jinghpaw mungdaw hta gaw, 2010 hta USDP dang nna 2015 hta gaw NLD dang ai re.

Tinang mungdaw kata tinang amyusha pati me dang lu hkra, Jinghpaw pati ni pawnghpawm na hpe mungshawa ni dip n-gun jaw ai hte maren, mungshawa ga madat nna pati mali— Kachin State Democracy Pati (KSDP), Kachin Democratic Party (KDP), Unity and Democracy Party of Kachin State (UDPKS) hte United Nationalities Federal Democracy Party (UNFDP) gaw tinang pati ni hpe jahten hkam nna, grau kaba ai pawnghpawm pati, Kachin State People’s Party (KSPP) hpe hpaw nna pawng gahkyin sai re.

Ya ten, KSPP gaw Jinghpaw Mungdaw ting, yawng ginwang (myu-ne) (18) kaw ralata poi shang na hkyen nga sai lam, pati ningbaw ni tsun ai re.

Myen hte bilateral gap hkat jahkring lam galaw na jahkrup nga ai, Wunpawng Mungdan Shanglawt Hpung (KIO) mung, Myen asuya, hpyendap hte mungmasa matut n di hkra galaw ra na sawn ai majaw, ndai asuya a lamang kaba lahkawng— Ralata Poi hte du na August shata Munghpawm Simsa Lam Hkumra Zuphpawng-Tsaban (21) Panglong Zuphpawng de KIO gara masa hku shanglawm lu hkra, mungshawa ningmu la ai SMJH (Shawnglam Mungmasa Jasat Hpung) zuphpawng hpe Laiza kaw June 19-20 hta galaw wa sai re.

Shiga

KSPP gaw Myitkyina sut du ni hte man hkrum lusha poi galaw

Leave a comment

Kachin pati pawnghpawm hpung, Kachin State People Party a shawng n’nan lang sut hpaga madu ni hte man hkrum lusha sha poi hpe Nov. praw 2 bat Kru Ya shana Myitkyina mare kaw galaw wa sai re.

Ndai lamang hpe KSPP rung daju Shatapru e galaw ai kaw saw shaga tawn ai sut hpaga hpung ni kaw nna salang 40 hkawt sa du sai re. Shanhte hta Myen hte Rahkai sut du ni mung shanglawm ai lam chye lu ai.

Shana lusha poi galaw ai yaw shada lam hte seng nna KSPP pran wan ningshawng komiti a Ningtau Ningbaw rai nga ai Duwa Gumgrawng Awng Hkam ndai zawn tsun ai.

“Pati a yaw shada lam masing hpe du sa ai lauban ni hpe tsun dan ai, shawnglam masing hpe anhte ni tsun dan ai. 2020 ning a hpang de anhte ni gara hku galaw na ngu ai hpe mung sanglang dan ai,” nga ai.

2020 ra lata poi hpang de mung, myu mare kata Wunpawng amyusha ni hta pawnghpawm ai n-gun ja ai pati kaba langai byin tai wa hkra KSPP shakut nga ai lam hpe Myitkyina daju sut hpaga hpung ni hpe tsun dan ai lam, Duwa Awng Hkam tsun ai re.

Shana shat sha poi de sa shanglawm ai sut hpaga hpung ni kaw nna mung pati hpe alu gumhpraw Myen kyat sen 100 jan jaw ai lam chye lu ai.

Shiga

‘Kachin State People’s Party KSPP’ hpe mungshawa hpang de shachyen ya

Leave a comment

Tara shang party rai wa sai Jinghpaw mungmasa pawng hpawm party ‘Kachin State People’s Party’ KSPP hpe mungshawa hpang de shachyen ya let kyuhpyi ap ai lamang hpe July 29 ya shani Myitkyina manau wang Majoi gawknu e galaw wa sai re.

Kachin Democratic Party KDP, Kachin State Democracy Party KSDP hte Unity and Development Party Kachin State UDPKS party 3 gaw shanhte a party hpe dawm kau nna Jinghpaw mungdaw gawng malai ‘KSPP’ party hpe kaba dik ai hku pawng hpawm dat sai re.

Ya na zawn party pawng hpawm dat ai majaw du na 2020 ra lata poi hta mungdaw kata ginwang 18 tup hta me dang na matu myit mada ai hte hkyen lajang nga sai lam KSPP hpat wat woi awn committee ningtau ningbaw-2 rai nga ai Duwa Gumgrawng Awng Hkam ndai zawn tsun ai.

“anhte pati hte seng nna mungshawa hpe shachyen ya ngut ai hpang magam bungli hpang sa na re. Ginwang 18 nga ai re majaw dai ginra ni hta committee sa hpaw na. Zinlum committee ni hpe mung hpaw nna kade nna yang bungli galaw hpang sa na. ra lata poi shang shingjawng na dat kasa gaw 50 jan na re.”

Jinghpaw mungshawa ni hpe party a lam shachyen ya ai ndai lamang de Myen, Sam hkyen hte Rakhine amyusha ni hku nna mung KSPP hpungshang hku nna mying jahpan bang wa ai hpe mu lu ai.

“ndai pati a rit kawp tara ni hpe ra ai. Pati policy hta num la, amyusha, matsan lu su n ginhka ai sha Federal mungmasa de san a nga tsun da ai. Panglung myit hkrum lam hte maren tatut galaw sa wa na nga ai majaw ngai mung pati de shang wa ai re” nga nna Mugaung Samhkyen laili laika hte htunghking hpung ningbaw Slg. Tin Nyunt tsun ai re.

Bat 1 ya shani galaw ai ndai party shachyen hkalum kyuhpyi hpawng de Jinghpaw mungdaw ginra shagu na mungshawa 500 daram sa du shanglawm ai hpe mu lu ai.

Jinghpaw party pawnghpawm lam a shawng ningnan lahkam hku nna 2018 January 13 ya shani Kachin Democratic Party KDP, Kachin State Democracy Party KSDP, Kachin National Congress KNC hte Lahvo National Unity and Development Party LNUDP party 4 gaw Myitkyina YMCA e bawngban wa ai re.

Dai shani bawngban ngut ai hpang LNUDP hta lai ngam ai party 3 gaw pawnghpam na matu hte party a mying hte dawnghkawn dazik ni hpe mungshawa hpe lata shangun na matu shada myit hkrum masat MOU lekmat htu hpang wa ai re.

Dai hpang Wunpawng Amyusha Mungbawng Rapdaw WMR woi awn ai hte 2018 April 10 ya shani Majoi gawknu e mungshawa zuphpawng langai galaw nna dai mungshawa party a mying, dawnghkawn hte dazik ni hpe lata shagrin na matu marai 17 committee hpe hpaw dat ai re.

Dai shani sha party pawng hpawm ai lamang de Unity and Development Party Kachin State UDPKS mung shawng lawm wa ai majaw party 4 rai wa sai re.

Raitim matut bawngban wa ai lamang ni hta KNC party gaw shi a party hpe nlu dawm ai majaw KNC mying hte nlu shanglawm sai raitim, KNC hpung shang nkau hpe pawnghpawm party ningnan de htawt wa na matu myit hkrum da ai re.

July 29 ya shani du hkra KNC party kawn KSPP party ningnan de htawt wa ai marai 120 daram rai sai lam KSPP hpat wat woi awn committee ningbaw Dr. Manam Tu Ja, Jinghpaw Shiga Dap KNG de tsun ai re.

Lam amyu myu a majaw pawnghpawm party hta nlu shanglawm shi ai KNC, LNUDP, Lisu National Development Party LNDP hte Pawng Yawng Ramrawt hpung UNFDP party 4 naw ngam ai re.

Kachin State People’s Party KSPP gaw 2020 ralata poi hta Jinghpaw mungdaw kata ya asuya byin nga ai NLD party hte Myen hpyendap madi shadaw ai USDP party hte shingjawng na matu kaba dik Jinghpaw party langai byin wa sai re.