Tag Archives: ICJ

ICJ mahtai kade daram tang du na

Myen mungdan kata byin nga ai shinggyim ahkaw ahkang tawt lai amu, majan ru hka amu ni hpe hparan na matu Rohingya gabaw hte hkrai nre sha, kaga bawsang ni a lam hpe mung shalawm myit mang yang she byin mai na re nga nna Jinghpaw Amyushayi Hpung Thai Mungdan KWAT tsun ai re.

Amyu shamyit masing galaw nga ai majaw Myen mung hpe Gambia mungdan kaw nna tara jewat da ai lam hte seng nna Pran wan matsun lawng lam 4 hpe January 23 ya shani Nertherland The Hague mare Mungkan tara rung ICJ kaw nna dawdan ai re.

Dai hta e Myen mung hta Rohingya amyusha ni hpe amyu shamyit masing n-galaw hkra asuya kaw nna lajang na, Hpyendap, Pyithusit hte laknak lang wuhpung ni hku nna amyu shamyit masing n-galaw hkra sadi na ngu ai lawnglam ni hpe jahkrat dat ai re.

Raitim mung Myen mung a Shinggyim ahkaw ahkang tawt lai ai amu hte majan ru hka amu ni hpe tara rap ra lu hkra nga yang, amyusha bawsang ni a hkam sha lam hpe mung shalawm myit yang she mai na re nga nna KWAT amyu shayi hpung kaw nna lit nga ai Srn San Htoi tsun ai re.

Raitim mung ndai dawdan ai gaw Rohingya ni a matu sha nrai, Myen hpyendap a majaw shi ning ladaw law law wa tsin yam hkrum sha nga ai kaga amyusha ni yawng a matu mung tara rapra lam lu la ai nhtoi re nga nna, Maigan daju Jinghpaw Wunpawng Amyusha Hpung KNO January 27 ya shani ndau da ai re.

ICJ pran wan dawdan matsun hpe lama nhkan sa yang gara hku galaw na ngu ai tara nlawm ai majaw, myit mada lam nau nnga ai nga nna KWAT na Srn. San Htoi tsun ai.

Kachin State People’s Party KSPP a ningtau ningbaw langai rai nga ai Duwa Gumrawng Awng Hkam chyawm gaw ‘ICJ dawdan lam gaw mungkan a Myen mung ntsa ningmu re majaw, pat hkum shingdang ai lam ni nhkrum hkra, Myen asuya hku nna kaja dik ai hku bai galaw ra ai’ lam tsun ai re.

Rakhine mungdaw dingdung daw Rohingya amyu sha ni hpe Myen hpyendap gaw amyu shamyit masing galaw nga ai lam OIC mungdan ni a malai, Gambia gaw Myen mung hpe 2019 November e ahkyak la da ai re.

Mungdan lahkawng maga amu tang shawn ai lamang hpe December shata e galaw nna, ndai January 23 ya shani gaw Pran wan matsun lawnglam 4 hpe daw dan ai rai nga ai.

 

Hpung masum ICC-ICJ madi shadaw ai hpe bai dawm na, Miwa dip n-gun jaw

Mungkan tara rung ni, ICC hte ICJ hta Myen mung hpe jep san wa na lamang ntsa shanhte hpung masum ‘madi shada ai lam ndau tawn ai’ hpe, lawan ai hku bai dawm kau na matu, Miwa asuya dip n-gun jaw wa sai lam chye lu ai.

Ndai lam hpe, Dec. praw 5, bat Mali Ya shani, Miwa asuya salang ni, Myen-Miwa ga jarit NDAA (National Democratic Alliance Army) ginjaw Mongla kaw Dingdung Daw Daphpawm na Rahkai AA, Balawng TNLA hte Kokang MNDAA, salang ni hte hkrum ai shaloi tsun ai re nga, daphpawm shiga lawk tsun ai re.

“Mani (Dec. 5) Mongla de Miwa asuya ni du sa nna Wa (UWSA) ni pyi dai hpe ninghkap ai nanhte hpung masum dai zawn ndau ai hpe naw dawm kau mu ngu nna shanhte hpung masum salang ni hpe sa tsun ai da” nga nna Myen-Miwa ga jarit e nga ai daphpawm malawm salang langai, Jinghpaw Shiga Dap KNG de tsun ai re.

Sa du dip n-gun jaw ai Miwa asuya salang wa kadai re ai hpe gaw n chye lu shi ai.

Daphpawm na Wunpawng Mungdan Shanglawt Hpung (KIO) n lawm ai sha, Rahkai, Balawng hte Kokang, hpung masum pawng nna, ICC (International Criminal Court) hte ICJ (International Court of Justice) tara rung ni hta Myen mung tawt lai ai lam ntsa jep san ai lamang ni hpe ‘tsepkawp madi shadaw ai lam’, November 28 hta ndau dat ai re.

Rahkai mungdaw Rohingya amyusha ni ntsa amyu shamyit masing (genocides) galaw ai majaw, OIC (Organization of Islamic Cooperation) mungdan ni a gawng malai, Gambia mungdan tara jawat tawn ai hpe du na bat, Dec. 10-12 hta, shawa jep san ai lam (public hearings) galaw hpang wa na matu nhtoi masat tawn ai re. Dai lamang de Mungdan Hpaji Jaw, salang jan Awng San Su Chyi woi ningbaw let sa du ningdang na matu hkyen tawn ai re.

The Hague ICJ de rawt na mahka, Slgj. Su Chyi hpe Miwa Mung Kongsi salang hte Maigan Kyithkai Dap, Hkringmang Slg. Wang Yi gaw Dec. 7 ya shani Naypyidaw kaw laklak lailai sa du hkrum shaga wa sai re.