Mungmyit Sinli, Kuthkai gat kaba hte lawk shara nkau hpe Myen hpyendap bawm jahkrat bun ai hpang, mung mare masha nkau shimlam myit tsang ai majaw, hprawng koi yen mat ai lam chye lu ai.
Kuthkai mare kata na Lawk nkau hta mungshawa yawng ngu na daram koi yen ma sai rai nna, ya du hkra nbungli hpyen myit tsang let matut nga nga taw ai lam, Kuthkai ginra amyu shayi langai KNG shiga dap hpe tsun ai re.
“Myit tsang dik goi, dai majaw she yawng hprawng yen ma sai. Kutkai kaw gaw ya ten katsi katsang byin nga ai. lawk 3, lawk 4 hkan gaw nta yawng yawng ngu na ram, zaw she hkat tawn ai. sumpum 3 kaw na sumpum 2 ram gaw koi yen sai. Lashio hpe tat sum kau ai hte ndai de mung bawm ni wa jahkrat ai rai nga. Myit tsang ai gaw gara hku tsun dan na ga si pa tam n mu ai.. dai majaw hpa pyi nchye tsun sai.” nga nna, Kutkai ginra, amyu shayi langai KNG shiga dap hpe tsun ai re.
Ya ten lahta Sammung ting matut mahkai mai ai baw phone, Internet yawng yak taw nna, Kuthkai kaw mung matut mahkai line ni n nga ai majaw, ginra masha ni hte matut lu na matu yak nga ai re.
Lai wa sai August praw 5 ya shani Kuthkai gat hte Lawk nkau hpe Myen hpyendap nbungli bawm jahkrat bun ai majaw gat pa yawng wan hkru hten mat nna, dum nta nkau mung hten za mat ai re.
Dai sha n-ga mung masha marai 6 asak si sum nna, marai 12 hkala hkrum ai lam ntsa lam chye lu nna, kata lam hkrak tup nchye ai lam, Kuthkai ginra masha wa matut tsun ai re.
“bat mi laman, nbungli the 2 lang wa jahkrat ai ka rai nga ai. Kutkai gat yawng wan hkru mat sai gaw. August praw 5 ya shani wa jahkrat ai kaw Kutkai gat pa ting wa hkru mat ai. bai na lawk 3 gat pa lahta de mung bawm jahkrat kau da ai. dai hpang Kutkai Byuhar dap kawng hte balik dap hpe bai bawm wa jahkrat ai. dai kaw chyawm hpyendap kata she re majaw, kade si hkala ai shiga n shale sai le i.” nga nna, Kutkai ginra nga Kanu num wa matut tsun dan ai re.
Kuthkai gat pa hpe myen hpyendap nbungli bawm n jahkrat shi yang hkying hkum 2 daram hta nbungli langai hte shawng kin yu yu hkawm nna, dai hpang Pawng 500 namnak nga ai Nbungli bawm kaba hte matut manoi bawm jahkrat bun wa ai lam ginra masha ni tsun ai re.
Lani mi din ai hpang August praw 7 ya shani mung kalang bai Kutkai Byuhar hpyendap hte balik dap khan myen hpyendap nbungli bawm wa jahkrat bun wa nna, kata lam si hkala ai lam chyawm n chye lu ai lam ginra masha ni tsun ai.
Ta’ang Amyusha Rawtmalan Hpung TNLA, jum tek tawn ai Kuthkai ginra hta Kokang MNDAA mung shara la shamu shamawt ai lam nga nna, myen hpyendap gaw lashio hpe tat sum kau ai hpang ya na zawn mare kaba ni de nbungli bawm wa jahkrat bun ai lam ni galaw nga ai rai nga ai.
Myen hpyendap kaw nna, ya na zawn nbungli hte bawm maja jahkrat bun nga ai sat lawat ntsa dingdung daw rawt malan pawng hpawng wuhpung 3 kaw na ndau laika ni shapraw let miwa mungdan hte mungdan shagu de Myen hpyendap a galaw ai lam hpe jawm pat shingdang ya lu na matu hpyi shawn nga ai lam ni nga ai re.
