Manmaw ginra hta Ph, Internet pat da ai bat masum daram hta Myen hpyendap laknak kaba gap ai majaw mung masha ni hkala nba byin nna, asak si sum ai lam ni ding yang byin nga ai re.
Mamaw myo mare kaba hte ni kahtep ai Nmawk Myen hpyendap Hka.M.Y 437 dap ni hte majan byin nga ai shara de , Myen hpyen nbungli hte gap bun ai lam ni, majan kata hpyen dap lahkawng maga gap dat ai laknak kaba si nkau Manmaw mare makau grup yin hta wa hkrat kapaw ai lam ni byin nga ai re.
Myen hpyen nbungli bawm hte laknak kaba si ni gaw Manmaw myo mare kata hte shinggan ni hta wa hkrat kapaw ai rai nna, ndai Ph, Internet pat hkum da ai bat masum laman hta sha mung masha si , hkala hkrum ai yawng re yang marai 20 ram du wa sai lam Manmaw ginra masha ni tsun ai re.
Ya na zawn laknak kaba ni wa hkrat kapaw nna , ginra mung masha ni asak si sum ai lam ni dingyang byin nga ai mare kahtawng ni gaw Si-hat, Kawng Ja Yang , Nam hpa hte Tar Mai Lung dai mare kahtawng ni rai nga ai re.
Lai wa sai bat sum laman sha , hpyen majan a majaw mara kata mung masha marai 10 daram asak si sum wa nna, marai 10 jan hkala hkrum wa ai lam sawk sagawn chye lu ai re.
Dai zawn Si sum wa ai ni hte hkala nba hkrum wa ai ni hta ma kaji ni hte a myu shayi ni ka-ang hkup ram lawm ai lam matut chye lu ai.
