Myen mung Kyat gumhpraw manu grau hkrat wa nna, maigan gumhpraw manu rawt nga ai majaw Miwa jarit mayan hkan nga ai hpyenyen ni mayak hkrum sha nga ai re.
Ya ten, shang gumhpraw lu ai gaw Myen kyats raitim, gun rai mari jai lang ra ai gaw Miwa Yuan madung re ai KIO uphkang ginra Miwa jarit mayan hkan nga ai hpyenyen ni mayak mahkak hkrum nga ai, Laiza makau Jeyang hpyenyen dabang na kanu num langai KNG shiga dap hpe ya na zawn tsun ai re.
“Gumhpraw manu nau rawt nna, myit htum nga le. Miwa the Myen mung jarit mayan kaw nga na gaw grai nga yak nga ai le. Gara de mung nmai tam sha, tam sha na shara mung nnga rai na gaw, grai yak ai ka rai nga ai. Gun rai mari gaw Miwa gumhpraw the mari ra, anhte lu ai gaw myen gumhpraw rai jang gaw.. ya Miwa gumhpraw 100 kaw myen gumhpraw Mun 8(80000MMK) – 100000MMK(Sen mi) ram bai rai jang gaw, yak ai le. Yiii myit ru mat sai. Ndai de gaw gayau gaya jai ai re majaw, miwa gumhpraw rawt jang myen gumhpraw hpa manu n dan mat sai.” Nga nna, Laiza makau Jeyang hpyenyen dabang na Kanu num langai KNG shiga dap hpe tsun ai re.
Ya na zawn, Myen Kyat gumhpraw manu dingyang hkrat nga ai ten Myen Kyat gumhpraw shata la hka sha nna, Miwa gumhpraw hte jai sha ra nga ai KIO uphkang ginra Miwa jarit mayan na, KIO npu hpaji magam gun ni hte ginra masha ni, Hpyenyen ni hta grau yak hkak kyin dut wa nga ai lam tsun ai re.
Myen kyat gumhpraw manu hkrat dingyang re majaw, US dollor, Miwa Yuan, Thai baht hte Malaysia gumhpraw galai manu ni grau rawt nga ai hte rau gumrai manu ni mung lani hte lani grau hpu wa nga ai re.
Ya ten, Miwa Yuan 100 kaw Myen gumhpraw Sen mi ram du nga ai rai nna, lai wa sai August 14 ya shani gaw 1 dollar kaw Myen gumhpraw 7000 jan du mat nna, Myen gumhpraw Sen mi kaw Thai Baht 500 jan sha lu mat hkra manu hkrat mat ai rai nga ai.
Ya na zawn ten hta, Myen mung kata nga nmai ai majaw, Maigan de du wa ai Jinghpaw mung na ramma ni gaw nta hte matut mahkai yak ai sha n ga, gumhpraw manu grai hkrat mat ai majaw grau jam jau nga ai lam Thai mung du nga ai Jinghpaw ramma ni tsun ai re.
“Ya sha na pyi nngam mat sai. Nta na ni hpe gumhpraw naw shagun ya na hku gaw tsun da ai. Gaw soi htuk sha ngam taw sai. Dai sha sha taw ra ai. N gu nnga sai. N ta kaw na gumhpraw shagun ya ai lam hta mayak byin taw ai.” nga nna tsun ai re.
Dai sha n ga, Thai mung Dakasu jawng langai kaw jawng lung nga ai Jinghpaw Ramma langai mung ya ten Jinghpaw mung phone line, Internet line mayak sha n ga, gumhpraw manu grai hkrat mat ai majaw jawng shabrai hpe aten dep bang lu na matu kahti kari, shadawn sharam let jai lang nga ra ai lam tsun ai re.
“Jawng shabrai hpe shanhte masat da ai aten hta n lu bang jang, tinang gaw jawng hkring yang mung hkring ra na. dai majaw grai yak kau sai. N nan kaw na tinang dang di ai gumhpraw manu hpe dinglik nna jawng lata lung taw ai raitim, ndai kaw gumhpraw manu ni grai bai rawt mat majaw tinang gaw gumhpraw jai ra ai ni hpe shadawn sharam kau let, jawng shabrai sha madung lu bang hkra shakut nga ra ai masa re.” nga nna, Thai mung Chaingmai kaw jawng lung ai jawngma shayi sha langai tsun ai re.
Lai wa sai 2024 shaning praw kaw na ya August shata du hkra shata 7 laman Myen Kyat gumhpraw htam 2 ram manu hkrat mat ai rai nga ai.
