US hte Miwa dat kasa ganawn mazum lam tsaw dik masa shaja hkat ai lam ni ndai bat kaw nna byin pru wa nga sai.
US maga shawng, bat Lahkawng Ya, July 21, hta Texas mungdaw Houston mare Miwa consulate (sumtsan kasa rung) hpe masum-ya laman pat kau na aming jaw ai hpang, bat Manga Ya, July 24, hta gaw Sichuan mungdaw Chengdu mare US consulate pat kau na matu, Miwa bai matai htang dat sai.
โNyan marai shalat madu ahkang (intellectual property) hte Amerikan masha ni a dinghkrai shiga (Americansโ private information)โ ni hpe shimlam jaw ra ai majaw Houston Miwa consulate hpe ahkyak la ai re nga, US Maigan Kyit Hkai Dap (State Department) tsun ai re. Raitim, dai dawdan lam gaw โhkap la n lu ai hte n tara aiโ jahte tam ai lam re nga nna, Miwa masat tsun ai re.
Miwa mung sinna daw kaba dik mare langai rai nga ai, Chengdu kaw US consulate hpe 1985ย hta hpaw nna, Sichuan, Yunnan, Guizhou, hte Tibet Madu Uphkang Ginra ni hpe hkyawm ai hku amu galaw nga ai re.
Shawng nโnan, Gumsan Magam Richard Nixon a Miwa mung de 1972 hta du nna โsa hku ganawn la ai ladat hte Miwa hpe galai shai shakut ai US polisiโ gaw bungli n byin sai nga nna, July 24, bat Mali Ya shani, US Maigan Kyit Hkai Hkringmang Dap, Slg. Mike Pompeo gaw Dingda California mungdaw Nixon Library hta, dai lam tsun wa sai re.
Pompeo matut nna, โGumsan Magam Nixon myit mada lai wa sai anhte a sa hku ganawn la ai ladat gaw Miwa hpe n galai shai lu ai. Daini Miwa gaw dinghku kata grau grau she gumshem wa ai sha n ga, kaga shara shagu de mung awmdawm shanglawt lam hpe ninghkap ai hpyen tai nga sai re.โ
Pompeo a mungga ntsa, pawt ai hte Miwa Maigan Kyit Hkai Dap a ga tsun ahkang lu, Slgj. Hua Chunying bai htang ai hta, shi gaw โMiwa hpe makam masham majan nโnan hpang dat saiโ ngu nna mara shagun tsun ai re.
Slgj. matut nna, โShi hpa mi galaw timung, kagyin langai hpun langai hpe ashun ai zawn kaman lila sha re,โ nga ai.
Miwa sumtsan salang rung (embassy) gaw Washington DC kaw rai nna consulate rung ni hpe Houson, New York, Los Angeles, San Francisco, hte Chicago ni kaw hpaw da ai re.ย Maga mi de, US sumtsan salang rung gaw Beijing kaw rai nna consulate rung ni gaw Chengdu, Shanghai, Guangzhou, Wuhan, Shenyang, hte laksan uphkang ginra Hong Kong ni hta nga ai rai nga ai.
Ya ten, mungkan ting COVID-19 ana zinli kap bra nga dingyang ladaw, dinglai n-gun kaba ai mungdan lahkawng, US hte Miwa lapran hpyen masa, mungmasa shaja hkat lam ni grau grau jat wa nga ai re.
