KIA Du Jawng Laknak Kaba Gap Hkrum ai Hpe Galoi Nmalap ai Nga Jinghku Rawt Malan Magam gun ni tsun

Myen Hpyen Dap KIA Du Jawng hpe Laknak kaba gap bun ai majaw, Du jawng lung taw ai jawngma marai 23 asak si hkrum ai dai ni (12) Ning ladu hkrum sai re.
2014 Ning November 19 ya shani ka-ang Hkaya Bum kaw dung ai Myen hpyen dap kaw na, 105 mm laknak kaba si gap bun ai majaw, Du Jawng lung nga ai jawngma marai (23) dai shara hta nan asak si hkrum wa nna, marai (20) mung hkala hkrum lai wa ai re.
Si hkrum ai marai (23) hta, Balawng TNLA Dap na marai (11) Rakhaing dap na marai (8) Hkang CNF na Marai (2) ABSDF Jawngma dap na marai (2) yawng marai (23) si hkrum wa ai rai nga ai.
Dai n htoi hpe Wunpawng Mungdan Shanglawt Hpung KIO hku nna, yawn hkyen n htoi shani hku nna, masat lai wa sai re.
Dai ten na magam gun ni shakut shaja ap nawng mat wa ai majaw, dai ni anhte naw ngam nga ai rawt malan magam gun ni shakut shaja nga lu ai re lam, Rahkaing AA Hpyen Du langai n dai zawn tsun dan tawn ai re.
“Laiza Du Jawng kaw laknak kaba hkrat ai majaw si mat ai anhte Myitrum manang ni hpe galoi n malap lu ga ai, shan hte ap nawng mat ai lam gaw an hte na matu n gun re, dai majaw, anhte naw ngam nga ai magam gun ni lu ai a tsam ma hkra hte shakut ai majaw, dai ni anhte Rakhaing Mung yawng ngu na ram hpe gasat padang dip wa lu sai nga,” tsun ai.
Hkaya Bum kaw dung ai Myen hpyen dap ni gaw, Du Jawng maga de sha n ga, Laiza grup yin de mung laknak kaba jahkring hkring gap shadam bun lai wa ai Myen hpyen dap langai rai nga ai.
Dai zawn laknak kaba hkrup mara gap bun ai Hkaya Bum Myen Hpyen dap shara hpe KIA hte Pawng hpawm Hpyen Hpung ni 2024 Ning March shata 9 ya shani zip zi bai gasat zing kau lu sai re.
Dai shani na mabyin lam hte seng nna, Du jawng lung nga ai magam gun langai gaw, dai shani byin lai mat ai hte seng nna, KNG de n dai zawn tsun dan tawn ai re.
“2014 dai shaning gaw Masat yan (6) rai nga ai, dai ten hpa majan mung n nga grai simsa taw nga ai ten kaw, Hkaya Bum kaw dung ai Myen hpyen ni laknak kaba gap bun dat ai gaw, shinggan kaw ding gren nga ai ni hpe hkra ai ga rai nga ai. dai si hkrum ai ni shan hkyep hkan hta ai wa dai ni du hkra malap n lu ai. Dai shawng kaw sha an hte yawng pawng na sharin ai kaw ga n hkrum na grai yak ai majaw, Myen hku sharin na ni hte Jinghpaw hku sharin na ni, hpung lahkawng garan kau ai rai nga ai,” nga tsun ai.
Matut nna, Balawng TNLA Hpyen la langai mung, shi a myitrum manang ni hpe dai ni ten du hkra malap n lu ai lam, n dai zawn tsun tawn ai re.
“Shan hte gaw Majan man kaw si mat ai ni n re sha, sharin shakyang jawng kaw hpyen hpaji shrin hkam la taw ai kaw si mat ai ni re. shan hte a prat dai kaw htum mat sai, dai majaw, n dai November 19 ya shani hpe galoi mung malap n lu ai, shan hte gaw share shagan ni re, shan hte shakut ap nawng wa ai majaw, dai ni n dai ten du hkra anhte ngam nga ai magam gun ni n dai zawn shakut shaja nga lu ai re.” nga tsun da ai re.



