Majan ShigaShiga

Mawlu Htim Shagrawt Majan Laja Lana Matut Gasat Hkat Taw Nga

Jinghpaw Mung hte Sagaing Jarit lapran Namsi Awng Mawlu lapran Noi Hkru Bum htim gasat majan matut byin nga ai rai nna, Mawlu makau grup yin ni hta dai na maga de du hkra laja lana gasat poi matut byin nga ai lam, shawng lam hpyen magam gun ni kaw na chye lu ai.

Mawlu Ginwang Pe Kung mare grup yin ni hta dai na maga sinat kaji kaba ni hte laja lana gasat poi matut byin nga ai lam hte seng nna, dai ginra de na shawng lam hpyen magam gun langai KNG shiga de n dai zawn tsun dan wa ai re.

“Majan gaw matut laja nga ding yang re. Noi Hkru bum hpe gaw Drone laknak kaba ni hte ding yang gap gasat taw nga ai, lahkawng maga hpyen shamu shamawt htu shadut wa jang, majan gaw ding yang dai hku naw byin nga ding yang re ga rai nga ai, dai na maga jan du wa ten du hkra Pekung mare makau grup yin kaw sinat kaji kaba ngoi ding yang re.” nga tsun ai.

November praw 8 ya shani PDF pawng hpawm maga na shawng sa htim gasat ai Noi Hkru Bum ngu ai shara gaw, Mawlu Muklum a matu hpyen masa lam hta ahkyak dik, byuha ang ai shara re lam matut chye lu ai.

Dai shara gaw, Namsi Awng hte Mawlu lapran dap shara kaw nga ai rai nna, Namsi Awng shagyit hte Deng 2 daram sha tsan ai rai nna, Mawlu hte gaw deng 4 daram sha tsan shara re lam chye lu ai.

Mawlu Muklum hpe htim gasat zing madu lu na matu hte Myitkyina Mandalay lam hpe jum tek lu na matu KIA, ABSDF, NUG PDF, P K Hp, PDF Laksan Dap-pram hpyen hpung ni, Kadu hpyen hpung ni jawm nna, htim gasat taw ai lam mung rai nga ai.

Myen hpyen maga na mung shani shagu ngu na Y-12 Nbungli hte bawm wa jahkrat bun nga ai sha n ga, malu masha ni mung wa jahkrat ya nga ai re lam matut chye lu ai.

Related Articles

Back to top button