Majan ShigaShiga

Mungmyit Hpyenman de Myen Hpyen maga Helicopter hte wa gasat nga

Dai hpawt manap hkying (7) aten daram kaw na, Mungmyit mare Myen Hpyen dap kata kaw na, laknak kaba gap shapraw taw ai sha n ga, Helicopter nbungli hte mung wa gap bun nga ai lam ginra masha ni tsun shana wa ai re.

Mungmyit Hpyen man de Myen hpyen maga hpyen hpung 3 hpaw nna, htim gasat yu ai rai tim, awng dang ai lam n lu hkraw ai majaw, laknak kaba drone ni hpe madung jai lang nna htim gasat taw nga ai lam, ginra masha langai KNG de n dai zawn tsun ai re.

“Daihpawt hkying 7:30 am ten kaw na bai ngoi hpang taw sai. shani hkying 10:45 kaw Helicopter hte wa gap bun ngut ai hpang, dai na maga hkying 3 tup hta mung Helicopter hte kalang bai wa gap bun nga sai,” nga tsun ai.

Dai hpawt hkying 7 chyen kaw na Laknak kaba gap shapyen bun ngut ai hpang, Helicopter nbungli hte laja lana bai wa gap bun wa ai mung rai nga ai.

Laknak kaba nbungli hte wa gap ngut ai hpang, lagaw lam hku bai htim gasat wa ai majaw, majan laja lana gasat poi matut byin nga ai hpe chye lu ai.

Myen hpyen ni gaw, Mungmyit mare kaw na Nmau Hka Myitsone Deng 11 shara du hkra htim gasat da lu sai rai tim, KIA hte Pawng hpawm maga bai ninghkap gasat ai majaw, Myen hpyen ni Deng 4 maga de du hkra bai htingnut yu mat ai rai nga ai.

Mungmyit kaw na, Mabeing, Shwegu, Manmaw, ginra ni hpe bai gasat na matulai wa sai September shata kaw na Hpyen n-gun kaba hte bai htim gasat wa ai gaw dai ni ten du hkra rai tim, Mungmyit mare grup yin hta hkrai majan naw byin nga ai mung rai nga ai.

KIA hte PDF pawng hpawm maga na mung, gasat zing tawn lu sai shara ni hpe n tat sum hkra, lu ai a tsam hte hkap shingla gasat taw ai re lam dai ginra na magam gun ni tsun ai re.

Related Articles

Back to top button