Sam Amyusha hte Kachin Amyusha ni a lapran Myen Hpyen Sumprat dawk nga ai lam, KIO Tingnyang Up Dukaba Nban La Tsun
Gumshem Myen hpyen dap gaw, Jinghpaw hte Sam amyu bawsang shada lapran sai garan ginhka sumprat dawk ai lam ni grau grau galaw wa ai nga, KIO Tingnyang Up Dukaba Nban La tsun mat ai re.
2026 ning (66) Ninghpring KIO Party Masat Nhtoi Mungga hta Ndai zawn tsun mat ai re.“Gumshem Myen Hpyen Dap Asuya gaw, aten shaning na na rau nga pra hkrat wa ai, Sam amyu hte Kachin amyu sha ni a lapran hta sumprat dawk nna n ru n ra byin shangun nga ai. 2021 Ning ahpang Sam Hkyeng (SNA) ngu ai mying hpe tek jum nna hpyen gasat gala lam ni byin wa ai gaw ngangkang ai sakse rai nga ai,” nga nna tsun tawn ai re.
Wunpawng Mungdan Shanglawt Hpung gaw, Myen amyu kaba lailen lang nna dip ka-up wa ai hpe Mungmasa ladat hku hparan la nmai mat ai majaw laknak lang rawt malan na matu Wunpawng Mungdan Shanglawt Hpung hpe hpaw ra wa ai lam matut tsun da ai re.
Dai ning na (66) Ning hpring KIO masat nhtoi mungga hta, Myen hpyen dap gaw 2021 ning daru magam zing kau ngut ai hpang, Jinghpaw mung kata Kachin hte Sam amyu baw sang ni a lapran sumprat dawk ai lam hpe grau madung tsun mat ai hpe mu lu nga ai re.
Ya na zawn Sam hte Jinghpaw lapran sumpran kaw sumprat dawk ai lam Ningbaw kaba tsun mat ai lam hte seng nna, Nawnglut ginra na Sam amyu shayi langai gaw shi a hkam sha lam hpe n dai zawn tsun ai re.
“Moi lai sai ten Sam hte Jinghpaw ni lapran manghkang byin lai wa yu ai hpe matsing gun lang nna, tinang dinggyeng akyu lu lawm lam a matu Myen hpyen maga tsap nna, amyu shada manghkang shabyin taw ai ni mung mu mada lu taw ai,” nga tsun ai re.
KIO Party masat n htoi lamang hpe KIO Ginjaw Laiza muklum kaw galaw wa ai zawn, Dapba, Dap dung shagu ni hta mung, KIO Party masat n htoi mungga hkam la ai hpawng galaw wa ai sha n ga, ginsup shingjawng ai lam ni, shana yungwi pinra kahkrang lamang ni galaw wa ai lam hpe KIO Shiga lawk hta mu lu nga ai re.
