Lashio kaw na Jinghpaw mung Manwingyi maga de lai lung wa ai mawdaw langai hpe KIA pawng hpawm shagyit kaw hkap jep yu ai ten, Kani Hpraw htaw tawn ai mawdaw hpe hkap mu jep ai lam, KIO Shiga lawk hta tsun tawn ai re.
October 20 ya jahpawt Lashio de na lung wa ai Vigo Four Wheel Mawdaw langai hpe Hinlung pawng hpawm shagyit kaw hkap lu rim ai lam tsun tawn ai re.
Dai Mawdaw hpe hkap jep yu yang mawdaw kata Kani hpraw Sabya kawk 1012 hte Kani chyang Joi lahkawng jan hpe hkap sawk jep mu ai lam tsun ai re.
Kani hpraw htaw shalai wa ai yan gaw, Lashio mare na Balawng Mai A Naing ngu ai wa hte, Kutkai na Sham Nawng Lat ngu ai yan re lam chye lu ai.
Ya ten dai yan hpe Nmau Ginwang Ginjaw Patjasan de shalai ap da sai lam chye lu ai.
