𝐋𝐚𝐦 𝐆𝐚𝐥𝐚𝐰 𝐍𝐚 𝐌𝐚𝐭𝐮 𝐙𝐮𝐩𝐡𝐩𝐚𝐰𝐧𝐠 𝐠𝐚𝐥𝐚𝐰 𝐧𝐠𝐚 𝐚𝐢 𝐊𝐚𝐰 𝐊𝐈𝐀 𝐃𝐫𝐨𝐧𝐞 𝐛𝐚𝐰𝐦 𝐬𝐚 𝐣𝐚𝐡𝐤𝐫𝐚𝐭 𝐚𝐢 𝐦𝐚𝐣𝐚𝐰, 𝐌𝐮𝐧𝐠 𝐒𝐡𝐚𝐰𝐚 (𝟏) 𝐒𝐢 𝐧𝐧𝐚 𝐌𝐚𝐫𝐚𝐢 (𝟐) 𝐇𝐤𝐚𝐥𝐚 𝐡𝐤𝐫𝐮𝐦

Hpakant Lam nmaw kaba gram na matu, Hpakant Myen Hpyen Uphkang rung kaw zuhpawng galaw nga ai ten, KIA Drone sa jahkrat bun ai majaw, mung shawa marai 1 si nna, marai 2 hkala hkrum wa ai lam, Hpakant ginra masha ni kaw na chye lu ai.

Dai ni October 7 ya shana maga hkying 1:30 ten daram hta KIA maga shapyen dat FPV drone Hpakant Myen Hpyen Asuya Ginwang Uphkang rung kaw wa hkrat ai lam chye lu ai.

Dai ni gaw Kamaing Hpakant Nmaw lam kaba gram na matu Hpakant Myen Hpyen Uphkang rung kaw na, ginra myitsu kanu kawa ni hte Company lauban ni hpe shaga la nna, lam galaw na hte seng nna hkrum bawngban taw ai ten, sa jahkrat bun wa ai re lam Hpakant ginra masha langai KNG de n dai zawn tsun dan ai re.

“𝑫𝒂𝒊 𝒏𝒊 𝒈𝒂𝒘 𝑲𝒂𝒎𝒂𝒊𝒏𝒈 𝑯𝒑𝒂𝒌𝒂𝒏𝒕 𝒍𝒂𝒎 𝒈𝒓𝒂𝒎 𝒏𝒂 𝒎𝒂𝒕𝒖 𝒕𝒉𝒆 𝒔𝒆𝒏𝒈 𝒏𝒏𝒂, 𝒃𝒂𝒘𝒏𝒈𝒃𝒂𝒏 𝒂𝒊 𝒓𝒂𝒊 𝒏𝒈𝒂 𝒂𝒊. 𝑴𝒚𝒆𝒏 𝒉𝒑𝒚𝒆𝒏 𝒅𝒂𝒑 𝒎𝒂𝒈𝒂 𝒈𝒂𝒅𝒂𝒊 𝒏 𝒍𝒂𝒘𝒎 𝒂𝒊, အုပ်ချူပ်ရေး 𝒎𝒂𝒈𝒂 𝒏𝒂 𝒏𝒊 𝒉𝒕𝒆 𝒎𝒖𝒏𝒈 𝒔𝒉𝒂𝒘𝒂 𝒎𝒂𝒈𝒂 𝒏𝒂 𝒏𝒊 𝒉𝒌𝒓𝒂𝒊 𝒍𝒂𝒌𝒔𝒂𝒏 𝒉𝒌𝒓𝒖𝒎 𝒃𝒂𝒘𝒏𝒈𝒃𝒂𝒏 𝒂𝒊 𝒉𝒑𝒂𝒘𝒏𝒈 𝒓𝒆,” nga tsun ai.

Kamaing Hpakant lam ding yang mala la hten nna, mawdaw lai hkawm na matu pyi n loi mat ai majaw, Hpakant lam nmaw kaba gram na matu, lai wa sai bat hta Company lauban ni hte Myitsu kanu kawa nkau hpe Tatma kawng de shaga nna zuphpawng woi galaw ai lam nga ai hpe chye lu ai.

Tatma kawng kaw shawng zuphpawng galaw ngut ai hpang, Asuya hkrang hku nna, Uphkang rung kaw zuphpawng bai woi galaw wa ai re lam chye lu ai.

Dai zawn zuphpawng galaw nga ai ten, FPV Drone sa jahkrat bun ai majaw mung shawa marai langai si nna, marai lahkawng hkala hkrum wa ai rai nga ai.

Hkala hkrum ai marai 2 gaw, rung shawng kaw gat dut ai gat dut num langai hte Myen la langai hkala hkrum wa ai rai nga ai.

Si hkrum ai Salang wa gaw, Sutdu kaba Kwi Pin KNDPC a company na Datkasa(ကိုယ်စလှယ်) Salang Darun Zau Awng ngu ai wa re lam chye lu ai.

Darun Zau Awng gaw, Hpakant Goft pa na Ningbaw langai mung rai nna maga mi de Mung shawa akyu bungli lam hta grai shakut galaw ai wa re sha n ga, Shanglawt the Myen hpyen lahkawng maga na Du Salang ni grai hkungga masat shagrau ai Salang langai mung re lam chye lu ai.

Ya na zawn shi n nga mat wa ai a n tsa Hpakant ginra mung shawa ni yawng myit yawng nga ai lam, Hpakant ginra masha langai mung n dai zawn tsun ai re.

“ 𝑺𝒂𝒍𝒂𝒏𝒈 𝑫𝒂𝒓𝒖𝒏 𝒁𝒂𝒖 𝑨𝒘𝒏𝒈 𝒈𝒂𝒘 𝒎𝒖𝒏𝒈 𝒔𝒉𝒂𝒘𝒂 𝒃𝒖𝒏𝒈𝒍𝒊 𝒈𝒓𝒂𝒊 𝒈𝒂𝒍𝒂𝒘 𝒂𝒊 𝒘𝒂 𝒓𝒆, 𝒈𝒂𝒅𝒂𝒊 𝒉𝒑𝒆 𝒎𝒖𝒏𝒈 𝒍𝒂𝒄𝒉𝒚𝒆𝒏 𝒍𝒂𝒉𝒌𝒂 𝒏 𝒏𝒈𝒂 𝒈𝒂𝒓𝒖𝒎 𝒄𝒉𝒚𝒆 𝒂𝒊 𝒘𝒂 𝒓𝒆. 𝑴𝒚𝒆𝒏 𝒉𝒑𝒚𝒆𝒏 𝒅𝒂𝒑 𝒕𝒉𝒆 𝑺𝒉𝒂𝒏𝒈𝒍𝒂𝒘𝒕 𝑫𝒂𝒑 𝒏𝒂 𝑫𝒖 𝑺𝒂𝒍𝒂𝒏𝒈 𝒏𝒊 𝒚𝒂𝒘𝒏𝒈 𝒉𝒕𝒆 𝒎𝒖𝒏𝒈 𝒑𝒓𝒊 𝒏𝒚𝒆𝒎 𝒉𝒌𝒓𝒂 𝒌𝒂𝒏𝒂𝒘𝒏 𝒎𝒂𝒛𝒖𝒎 𝒄𝒉𝒚𝒆 𝒂𝒊 𝑺𝒂𝒍𝒂𝒏𝒈 𝒓𝒆. 𝒚𝒂 𝒏𝒂 𝒛𝒂𝒘𝒏 𝒎𝒖𝒏𝒈 𝒔𝒉𝒂𝒘𝒂 𝒂𝒌𝒚𝒖 𝒂 𝒎𝒂𝒕𝒖 𝒛𝒖𝒑𝒉𝒑𝒂𝒘𝒏𝒈 𝒈𝒂𝒍𝒂𝒘 𝒏𝒈𝒂 𝒂𝒊 𝒌𝒂𝒘 𝒅𝒓𝒐𝒏𝒆 𝒃𝒂𝒘𝒎 𝒉𝒌𝒓𝒂 𝒏𝒂 𝒔𝒊 𝒎𝒂𝒕 𝒂𝒊 𝒏𝒈𝒖 𝒈𝒂𝒘 𝒂𝒏𝒉𝒕𝒆 𝑯𝒑𝒂𝒌𝒂𝒏𝒕 𝒎𝒖𝒏𝒈 𝒔𝒉𝒂𝒘𝒂 𝒏𝒊 𝒂 𝒎𝒂𝒕𝒖 𝒔𝒖𝒎 𝒎𝒂𝒄𝒉𝒚𝒊 𝒌𝒂𝒃𝒂 𝒓𝒆,” nga tsun ai.

Kachin National Development Public Company (KNDPC) Sutdu kaba Kwi Pin ngu ai Miwa la re lam chye lu ai.

Ndai laman hta Wunpawng Mungdan Shanglawt Asuya maga na mung, Dapba (9) the Dung (6) lam gram na matu, Company lauban ni hpe shaga la nna, zuphpawng ding yang galaw nga ai lam chye lu ai.

Hpakant lam nmai lai ai madang rai sai majaw, mung shawa ni yawng gaw, Hpakant lam hpe gram na matu ra sharawng nga ai lam mung shawa ni tsun ai.